دابەشکردنی مووچەی مانگی شوبات دوێنێ دەستیپێکرد، ئەمڕۆش چەند دەستە و وەزارەتێک مووچە وەردەگرن.
ئەمڕۆ یەکشەممە، دابەشکردنی مانگی شوبات بەردەوامە، بەپێی خشتەی وەزارەتی دارایی و ئابووری هەرێم تەنها لە ماوەی شەش ڕۆژدا مووچەی سەرجەم شوێن و وەزارەتەکان دابەشدەکرێت.
بەپێی خشتەی دابەشکردنی مووچەی وەزارەتی دارایی و ئابووری هەرێم کە بڵاویکردووەتەوە، ئەمڕۆ مووچەی وەزارەتی پەروەردە، داد، ئەنجومەنی دادوەری، ئەوقاف و کاروباری ئایینی، مافی مرۆڤ، دەستەی دەستپاکی، وەبەرهێنان، ژینگە، دەزگای مین، ناوچەکانی دەرەوەی هەرێم، کۆمسیۆنی باڵای هەڵبژاردن، دیوانی چاودێری دارایی و پلاندانان دابەشدەکرێت.
دابەشکردنی مووچەی مانگی شوبات لەکاتێکدایە کە مووچەخۆران لە ماوەی نۆ مانگی ڕابردوودا تەنها چوار مووچەیان وەرگرتووە، هاوکات ٥٧ بەسەر دواهەمین مووچەدا تێپەڕیوە کە مووچەخۆران وەریان گرتووە.
