ئەنجوومەنی وەزیرانی هەرێمی كوردستان بڕیاریدا بە لێخۆشبوون بە ڕێژەی 15% لە قەرزی پارەی كارەبای هاووڵاتیان و ماوەی 3 مانگیشی بۆ گێڕانەوەی قەرزەكە دیاری كرد.
كاسترۆ مەعروف، ئەندامی ئەنجوومەنی پارێزگای سلێمانی بۆ (خەڵك) ڕایگەیاند، لەسەر داوای ژمارەیەک لە ئەندامانی ئەنجوومەن لەڕێگای سەرۆکایەتی ئەنجومەنی پارێزگاوە، ئەنجوومەنی وەزیران دەرفەتێکی تری لێخۆشبوونی بۆ قەرزی پارەی كارەبا دایە هاووڵاتیان.
ڕاشیگەیاند، بە پێی بڕیارەكەی سەرۆكایەتی دیوانی ئەنجوومەنی وەزیران، 15% لە قەرزی پارەی كارەبای هاوبەشان دادەشكێنرێت، ئەگەر هاووڵاتیان لە ماوەی 3 مانگدا قەرزی كارەبا بگەڕێننەوە.
بەپێی نووسراوەكەی ئەنجوومەنی وەزیران، ئەو داشكاندنە لەسەر داواكاری ئەنجوومەنی پارێزگای سلێمانی بووە و هەر هاووڵاتییەك تا ماوەی 3 مانگ قەرزی پارەی كارەبا بداتەوە، بڕی 15%ی ئەو پارەیەی قەرزە لەسەری لێخۆشبوونی بۆ دەكرێت.
