شارەزایەکی کەشناسی پێشبینییەکانی کەشوهەوای بۆ ڕۆژانی ئایندە بڵاوکردەوە و ڕایگەیاند، شەپۆلێکی وشکەسەرما لە بایەکی چالاک ناوچەکانی هەرێم دەگرێتەوە.
ئاراس جەبار، شارەزای کەشناسی ڕایگەیاند، لە بەرەبەیانی سبەینێ یەکشەممەوە لە ئەنجامی کاریگەری بە ھێزی بەرزەپاڵەپەستۆی سیبیری لە سەر ناوچەکانی وڵاتی ئێران و باکووری ئێران شەپۆلێکی وشکەسەرما ناوچە جیاجیاکانی ھەرێمی کوردستان دەگرێتەوە، لەگەڵ چالاکبوونی بای باکووری ڕۆژھەڵات بە تایبەت لە ناوچە شاخاوییە سنووریەکان و ناوچەکانی پارێزگای سلێمانی، ئیدارەی ڕاپەرین و شاخاوییەکانی ڕۆژهەڵاتی پارێزگای ھەولێر بە خێرای ٢٠ تا ٤٠ کیلۆمەتر و ھەندێک کات بۆ زیاتر لە ٥٠ کیلۆمەتر لە کاتژمێرێکدا چالاک دەبێت.
ئاماژەی بەوەکرد، پلەکانی گەرما لەم ناوچانەدا سبەینێ بەراورد بە ئەمڕۆ ٤ تا ٦ پلە نزمبوونەوە بەخۆیەوە دەبینێت و ھەست بە سەرمایەکی زۆر دەکرێت لەگەڵ دابەزینی پلەی گەرمی بۆ ژێر سفر و بەستن لە ناوچە شاخاوییەکاندا، لە ناوچەکانی دیکەی ھەرێمدا کاریگەری ئەم ئاڕاستە بایە کەمتر دەبێت بە خێرای ١٥ تا ٢٥ کیلۆمەتر لە کاتژمێرێکدا، پلەکانی گەرماش ٢ تا ٣ پلە نزمدەبێتەوە، ئاسمان ساماڵ و کەمێک پەڵە ھەوری دەبێت لە ناوچە شاخاوییە سنووریەکانی ھەولێر کڕێوە بەفر دەبێت.
وتیشی، کاریگەری بای بەھێز و وشکەسەرما بە چالاکی تا ڕۆژی سێشەممە بەردەوامی دەبێت، لە ڕۆژی سێشەممەوە کاریگەری کەمدەبێتەوە، بەڵام بەردەوامی دەبێت تا ڕۆژانی سەرەتای مانگی داھاتوو .
ئەوەشی خستەڕوو، لەگەڵ بەردەوامی ئەم وشکە سەرمایەدا ڕۆژی سێشەممە لە ئەنجامی کاریگەری نزمەپاڵەپەستۆیەکی ساردی سەرەوەی بەرگەھەوا، لە دەریای ناوەڕاستەوە شەپۆلێکی لاوازی بارانبارینی پچڕ پچڕ ناوچە جیاجیاکانی ڕۆژئاوا و ناوەڕاستی عێراق دەگرێتەوە، کاریگەری ئەم شەپۆلە ڕۆژی چوارشەممە ناوچەکانی ھەرێمی کوردستان دەگرێتەوە بە نمە بارانی پچر پچر و بارینی بەفر بە ڕێژەی مامناوەند لە ناوچە شاخاویتەکاندا، پێشبینی بارینی بەفر لە سەنتەری شاری سلێمانیش دەکرێت و کاریگەری ئەم شەپۆلە کورت خایان دەبێت و بەرەبەیانی ڕۆژی پێنجشەممە کۆتای پێدێت.
