کەشناسی عێراق دۆخی کەشوهەوای بۆ ڕۆژانی داهاتووی ئەم هەفتەیە ڕاگەیاند و شارەزایەكی كەشناسی دەڵێت: سبەینێ لەکاتەکانی نێوان نیوەڕۆ بۆ ئێوارە ئەگەر کراوەیە بۆ چالاکبوونی ھەورە بروسکە و تاوە بارانی کورتخایەن لە شوێن و ناوچەی دیاری نەکراودا.
ئاراس جەبار، شارەزای كەشناسی بۆ (خەڵك) ڕایگەیاند، سبەی سێ شەممە 20/2/2024 لەئەنجامی بەردەوامی کاریگەری لاوازی نزمە پاڵەپەستۆی دەریای ناوەڕاست ئاسمانی ھەرێم بە زۆری نیمچە ھەور ئەبێت و لەکاتەکانی نێوان نیوەڕۆ بۆ ئێوارە ئەگەر کراوەیە بۆ چالاکبوونی ھەورە بروسکە و تاوە بارانی کورتخایەن لە شوێن و ناوچەی دیاری نەکراودا .
لای خۆشیەوە، دەستەی كەشناسی عێراق لە بەیاننامەیەكدا ئاماژەی بەوەكردووە، سبەی سێ شەممە لە ناوچەكانی ناوەڕاستی وڵات ئاسمان هەور و نیمچە هەوردەبێت و لە هەرێمی كوردستان هەور و باران و بروسکە دەبێت و لەباشووریش ساماڵ و هەندێک هەوراوی دەبێت، هاوكات پلەکانی گەرماش لەسەرانسەری وڵاتدا جێگیر دەبن.
ڕوونیشی كردۆتەوە، ڕۆژی چوار شەممەش لە ناوچەكانی ناوەڕاست ئاسمان ساماڵ و نیمچە هەور دەبێت و لە هەرێمی كوردستان هەندێک هەوراوی دەبێت و بارانی پچڕپچڕیش دەبارێت، لەباشووریش ساماڵ و هەندێک هەور دەبێت و پلەکانی گەرماش نزیک ڕۆژی پێشتر دەبن.
سەبارەت بە ڕۆژی پێنج شەممە و هەینی ئاماژەی بەوەكردووە، لە ناوچەكانی ناوەڕاست و باشوور ئاسمان ساماڵ و پەڵە هەور دەبێت، لە هەرێمی كوردستان هەندێک هەوراوی دەبێت و لە ڕۆژی هەینی ڕێژنە بارانی لەگەڵ دەبێت و پلەکانی گەرماش لەتەواوی ناوچەكانی وڵات كەمێك بەرزدەبنەوە.
