لەگەڵ هاتنی وەرزی زستان و سەرما و سۆڵەدا، زۆرێکمان تووشی پەتا وەرزییەکان دەبین، یان منداڵەکانمان تووشی پەتاکان دەبن.
دکتۆرە گەشبین کاوە، پسپۆڕی نەخۆسییەکانی منداڵان و تازە لەدایکبوان و گەشە چەند ڕێنمایی و هەنگاوێک باسدەکات.
چۆن سیستەمی بەرگری مناڵەکەم بەهێز بکەم بۆی پارێزراوبێ لە تووشبون بە پەتاکان؟
- ژەمە خواردنی تەندروست:
دەبێ ژەمەکان هەمەجۆر و هاوسەنگ بێت، پێکهاتبێت لە سەوزە و میوە، ٥ پارچە لە ڕۆژێکدا، وە بڕی پێویستی پڕۆتین و دانەوێڵە، وە شیرەمەنیەکان کە سەرچاوەیەکی باشی کالسیۆمە.
ئەو خواردنانەی کە نابێ بدرێ بە مناڵ بریتین لەو خواردنانەی، کە شەکری زیادە یان چەوری زیانبەخش لە پێکهاتەکانیان دایە، هەروەها خواردنە ئامادەکراوەکان و لەقتونراوەکان.
هەندێ جێگرەوەی خواردن هەیە بۆ بەهێزکردنی سیستەمی بەرگری، کە بریتین لە ڤیتامینەکان و ئاسن کەپێویستە بەپێ ڕێنمای پزیشکی پسپۆری مناڵان بەکاربهێنرێت.
- خەوی پێویستی ڕۆژانە:
کاتژمێری خەوی پێویست زۆر گرنگە بۆ تەندروستی مناڵ، مناڵی تەمەن ١ ساڵ پێویستی بە (١٢-١٦ کاتژمێر) خەو هەیە، وە تا دەگاتە تەمەنی (١٠-١٢) ساڵی کەمدەبێتەوە بۆ ١٠ کاتژمێر لە ڕۆژێکدا، دەبێ مناڵەکە ڕۆتینی خەوی ڕۆژانەی جێگیربێ لە نێوان کەتژمێر (٨-٩) بخەوێ، (٢) کاتژمێر پێش خەوتن مۆبایل و تەلەفزیۆن بەکارنەهێنێ.
3.چالاکی و وەرزشی ڕۆژانە:
مناڵ پێویستی بە (١) کاتژمێر وەرزش و جوڵە هەیە لە ڕۆژێکدا بۆ ئەوەی تەندروستبێ و سیستەمی بەرگری بەهێزبێ.
ئەتوانرێ جوڵەکە وەرزشێکبێ یان یاریکرن یان بەپێ ڕۆشتن.
4.کەمکردنەوەی سترێس:
بونی سترێس و فشاری دەروونی سیستەمی بەرگری لاواز دەکات. بۆیە پێویستە هەوڵبدەیت کات تەرخان بکەی بۆ چالاکی و کاتبەسەربردن لەگەڵ مناڵەکەت، وە هەوڵبە مناڵەکەت باسی ئەو شتانەت بۆ بکات کە بێتاقەتی دەکات و چارەسەری گونجاوی بۆ بدۆزنەوە.
5.کوتانەکان:
وەرگرتنی کوتانەکان لەکاتی خۆیدا بۆ مناڵان زۆر گرنگە، چونکە دەیپارێزێ لەچەند نەخۆشیەکی مەترسیدار وە سیستەمی بەرگری بەهێز دەکات بۆ ڕوبەڕوبونەوەی نەخۆشی.
