ئێوارەی ئەمڕۆ شەپۆلی لێزمەباران و هەورە تریشقە هەرێمی کوردستان دەگرێتەوە و سبەینێش لە ناوچە شاخاوییەکان پێشبینی بەفربارین دەکرێت.
بەشی پێشبینی لە وەزارەتی گواستنەوە و گەیاندنی هەریمی کوردستان ڕایگەیاند، ئەمڕۆ یەکشەممە، لە دواى نیوەڕۆوە کاریگەرى شەپۆلێکى باران بارین لەسەر ناوچەکەمان دەستپێدەکات.
ڕوونیشیکردەوە کە سەرەتا باران بارین مامناوەند دەبێت، پاشان لە ئێوارەدا لە پارێزگاکانی هەولێر و دهۆك بەهێزتر دەبێت و دەگۆڕێت بۆ لێزمەباران و هەورە تریشقە، درەنگانی شەویش کاریگەریی شەپۆلەکە دەگاتە سنووری پارێزگای سلێمانی و ئیدارەى راپەڕین.
پێشبینیشی کرد زۆرترین ڕێژەى دابارین لەسەر پارێزگاى دهۆک بێت بەتایبەتىش شیلادزێ، ئامێدى، جەمانکى و ئاکرێ، لە سنووری هەولێر و کەرکووکیش خێرایی با زیاد دەکات.
سەبارەت بە سبەینێ دووشەممە، بەشی پێشبینی لە وەزارەتی گواستنەوە و گەیاندن ڕایگەیاند، ئاسمان بە گشتی هەور و باراناوی دەبێت، ئاستى دابارینیش لە سەرجەم ناوچەکانی هەرێمی کوردستان لێزمە بارانی بەردەوام و هەندێ کات مامناوەند دەبێت.
ئەوەشی خستەڕوو کە لەگەڵ باران بارین، شەپۆلێکى بەفر بارین ناوچە شاخاوییە سنووریەکان و لوتکەى ناوچە شاخاویییە بەرزەکان دەگرێتەوە و کاریگەریی شەپۆلەکە لە درەنگانی شەوی دووشەممە لاواز دەبێت.
بەرزترین پلەکانی گەرمای پێشبینیکراو بە پلەی سیلیزی :
هەولێر : 14 پلەى سیلیزى
سلێمانی : 13 پلەى سیلیزى
دهۆک : 12 پلەى سیلیزى
کەرکووک : 16 پلەى سیلیزى
هەڵەبجە : 15 پلەى سیلیزى
زاخۆ : 15 پلەى سیلیزى
گەرمیان : 19 پلەى سیلیزى
حاج ئۆمەران: 3 پلەى سیلیزى
سۆران : 11 پلەى سیلیزى
