کەشناسی پێشبینی دەکات لە سبەینێوە کاریگەریی هەردوو نزمە پاڵەپەستۆی تورکیا و دەریای سوور لەسەر هەرێمی کوردستان دەربکەوێت و ببێتە هۆی دابەزینی پلەی گەرما و زیادبوونی خێرایی با لەگەڵ ئەگەری بەفربارین لە ناوچە شاخاوییەکان.
بەشی پێشبینی لە وەزارەتی گواستنەوە و گەیاندنی هەرێمی کوردستان بڵاویکردەوە، ئەمڕۆ ئاسمان بە گشتی نیمچە هەور دەبێت و ئەگەری پروشکە باران هەیە لەسەر هەندێ ناوچەى شاخاوى.
ڕوونیشیکردەوە کە لە سبەینێوە کاریگەرى نزمە پاڵەپەستۆى تورکیا لەسەر بەشەکانى باکوورى هەرێم و کاریگەرى نزمەپاڵەپەستۆى دەریایی سوور لەسەر بەشەکانى باشوورى هەرێم و ناوەڕاستى عێراق زیاد دەبێت.
ڕاشیگەیاند کە پێشبینی دەکرێت ڕۆژی چوارشەممە، ئاسمانى هەرێم بە دێژایی کاتەکانى هەور بێت لەگەڵ باران بارین و ئاستى دابارین لەسەر بەشەکانى باشوورى هەرێم بەتایبەت سنوورى پارێزگاى هەڵەبجە و ئیدارەى گەرمیان و سنوورى پارێزگاى کەرکوک زیاترە.
بەشی پێشبینی وەزارەتی گواستنەوە ئەوەشی خستەڕوو کە بە کاریگەریی ئەو نزمە پاڵەپەستۆیانە خێرایی با زیاد دەکات و پلەکانى گەرما 6- 8 پلەى سیلیزى دادەبەزێت، هەروەها لەسەر لوتکەى ناوچە شاخاوییە سنورییە بەرزەکان ئەگەرى بەفر بارین هەیە.
بەرزترین پلەکانی گەرمای پێشبینیکراو بە پلەی سیلیزی :
هەولێر : 20 پلەى سیلیزى
سلێمانی : 18 پلەى سیلیزى
دهۆک : 19 پلەى سیلیزى
کەرکووک : 21 پلەى سیلیزى
هەڵەبجە : 18 پلەى سیلیزى
زاخۆ : 21 پلەى سیلیزى
گەرمیان : 22 پلەى سیلیزى
حاج ئۆمەران : 9 پلەى سیلیزى
سۆران : 16 پلەى سیلیزى
