ئەمڕۆ شەممە، لوتکەی قاهیرە لە وڵاتی میسر لەژێر ناوی ئاشتیدا کۆبوونەوەیەکی بەپەلەی بۆ شەڕی نێوان ئیسرائیل و فەلەستین ڕاگەیاند.
لەکۆبوونەوەکەی ئەمڕۆی لوتکەی قاهیرەدا شاعەبدوڵای دووەم، پادشای ئوردن لەکاتی پێشکەشکردنی وتارێکدا ڕایگەیاند، ئەوەی ئیسرائیل بەرامبەر گەلی فەلەستین ئەنجامی دەدات بۆردومانێکی بێبەزەییانە و چڕە و بەهەمووشێوەیەک ڕەتی دەکەینەوە. وتیشی ئیسرائیل بەبتیشی ئیسرائیل بەبێ جیاوازی ئابڵوقەی گەلی فەلەستینی داوە و دەیانکوژێت و ئەوانیش هیچ هێزو توانایەکیان نییە کە ئەوەش بەزاندنی یاسا نێودەوڵەتی و مرۆییەکانە و بەتاوانی جەنگ دادەنرێت.
ئاماژەی بەوەشکرد، ئەوەی دەرهەق بەگەلی فەلەستین دەکرێت و جیهان لێی بێدەنگە لە لەناوبردنی ژێرخانی ئابوری و مەدەنی و بڕینی ئاو و کارەبا و خۆراک و پێداویستییە سەرەتاییەکانی دیکەی ژیان بۆ هیچ شوێنێکی دیکە لێی بێدەنگ نابن و ڕووبەڕووی تاوانبارەکە دەبنەوە.
باسی لەوەشکرد، کۆچپێکردن و ئاوارەکردنی فەلەستینییەکان لەسەر زێدی خۆیان هێڵی سورە، وتیشی پێویستە هەموو عەرەب لەوەتێبگات، چونکە پەیامەکە ڕوون و ئاشکرایە ژیانی فەلەستینییەکان هێندەی ژیانی ئیسرائیلییەکان گرنگ نییە، ژیانی ئێمە هێندەی ژیانی ئەوانیتر گرنگ نییە و تەواوی یاسا نێودەوڵەتییەکان و یاسا مرۆییەکان بۆ ءێمە سنووردارن کە ئەمەش پەیامێکی مەترسیدارە و ئەم کارەی ئەو زلهێزانە کارەساتێکی گەورە بۆ هەموومان دەهێنێتە پێشەوە.
یەکەمین داواکاری ئێمە ڕاگرتنی دەستبەجێی هێرشەکانە بۆسەر کەرتی غەززە و پاراستنی مەدەنییەکان و یاسا نێودەوڵەتییەکان. وتیشی دووەم داواکاریمان ئەوەیە هاوکارییە خۆراکی و تەندروستییەکان بەبێ پچڕان و دواکەوتن ڕەوانەی فەلەستین بکرێت.
دەشڵێت، سێیەم بەرنامەی کارمان ئەوەیە بەهەموو شێوەیەک ئاوارەبوون و ڕاگواستنی فەلەستینییەکان ڕەت دەکەینەوە کەئەوە تاوانی جەنگە بەگوێرەی یاسا نێودەوڵەتییەکان و بەنیسبەت هەموومانەوە بەزاندنی هێڵی سوورە، ئەگەر ئێمە بێدەنگبین و جیهان پشتی ئیسرائیل بگرن ئەوا دەستکراوەتر دەبێ و تاوانی گەورەتر ئەنجام دەدات و خوێنی زیاتری فەلەستینییەکان دەڕێژێت.
