ئامادەکارییەکانی کۆمسیۆن بۆ هەڵبژاردنی پەرلەمانی کوردستان بەردەوامن و سبەینێش دەنگدانی ئەزموونیی ئەنجام دەدرێت.
ئەمڕۆ دووشەممە، جومانە غەلای وتەبێژی کۆمیسیۆنی باڵای سەربەخۆی ھەڵبژاردنەکانی عێراق ڕایگەیاند، سبەینێ دەنگدانی ئەزموونیی لە هەولێر، سلێمانی، هەڵەبجە و دهۆک ئەنجام دەدرێت کە ئەویش لە چوارچێوەی ئامادەکارییەکان بۆ هەڵبژاردنە پەرلەمانییەکەی هەرێمی کوردستاندا دێت.
ڕوونیشیکردەوە دەنگدانە ئەزموونییەکە لە ژێر چاودێری عەباس فەتلاوی، سەرۆکی کارگێڕی ھەڵبژاردنەکان و موھەنەد عەباس، یاریدەدەری ھونەری کۆمیسیۆن بەڕێوەدەچێت.
وتەبێژی کۆمسیۆن ئەوەشی خستەڕوو کە دەنگدانە ئەزموونییەکە لە 180 وێستگەدا ئەنجام دەدرێت، حەوتیان بۆ دەنگدانی تایبەت و ئەوانی دیکەش بۆ دەنگدانی گشتی لە ناوەندەکانی تۆمارکردن دادەنرێن.
بڕیارە ڕۆژەی 10ی حوزەیرانی داهاتوو هەڵبژاردنی پەرلەمانی کوردستان بەڕێوەبچێت، هەرچەندە زانیارییە نافەرمییەکان ئاماژە بە ئەگەری دواخستنی دەدەن.
