ئەنجوومەنی جێبەجێكردنی یەكگرتووی ئیسلامی كوردستان بریارەكەی دادگای فیدڕاڵی سەبارەت بە مووچەخۆرانی هەرێم “دەنرخێنێت” و ڕایدەگەیەنێت، دوای 33 ساڵ لەڕاپەڕین كۆی ئەزموونی هەرێم لە قۆناغێكی سەختی سیاسیدایە.
ئەنجوومەنی جێبەجێ كردنی یەكگرتوو ئەمڕۆ دوو شەممە 4/3/2024 بە سەرپەرشتی مامۆستا سەڵاحەدین محەمەد بەهادین، ئەمینداری گشتی یەكگرتوو و د. هادی عەلی، سەرۆكی ئەنجوومەنی سەركردایەتی و د. محەممەد ئەحمەد، سەرۆكی دەستەی باڵای چاودێری و ئەندامانی ئەنجوومەن كۆبوونەوەی ئاسایی خۆی لە شاری هەولێر ئەنجامدا.
بەپێی ڕاگەیەنراوەكە، ئەنجوومەنی جێبەجێكردن لە چوارچێوەی ئامادەكاریەكانی هەڵبژارنی پەرلەمانی كوردستان تاوتوێی ڕاپۆرتی لێژنەكانی هەڵبژاردنی (هەولێر و دهۆك و سلێمانی و هەڵەبجە)ی كرد.
تەئكیدی كردەوە، كە یەكگرتووی ئیسلامی كوردستان بەردەوامە لەسەر (پڕۆژەی چوارچێوەی نیشتمانی دەنگی ناڕازی) كە كراوەیه لەبەردەم سەرجەم هێز و ڕێكخراو و كەسایەتیە نارازییەكانی شەقامی كوردستان، بە هیوای ئەوەی هەڵبژاردنەكەی (10/6/2024) سەرەتای قۆناغێكی نوێ بێ لە گۆڕانكاری ڕیشەیی.
ئاماژەی بەوەشكردووە، “وێرای نرخاندنی بڕیارەكەی دادگای فیدڕاڵی سەبارەت بە مووچەخۆرانی هەرێم جەختكرایەوە هەردوو حكومەتی هەرێم و ناوەند بە زوویی دەست بكەن بە دابەشكردنی مووچە لە كاتی خۆیدا”.
ئەنجوومەنی جێبەجێكردن یادی شکۆداری ڕاپەرینی 5ی ئاداری ساڵی (1991)ی بەرز نرخاند و هیوای خواست كە ئامانجەكانی راپەرین بە شێوەی كرداری جێبەجێ بكرێت و لە ئاستی قوربانیەكانی راپەرینی گەلەكەماندا بین و دەشڵێت: “دوای 33 ساڵ ڕزگاری و ئازادی، جێگای داخە لە ئێستادا کۆی ئەزموونەکەمان بە قۆناغێكی سەختی سیاسیدا گوزەر دەکات و پێویستە بەوپەری جدی و بەرپرسیارانە مامەڵەی دۆخەكە بكرێت و كێشە ناوخۆیی و دەرەكیەكانمان بەزووی چارەسەر بكەین”.
