لە كۆتاییەكانی ئەم هەفتەیە و سەرتای هەفتەی داهاتوودا دوو شەپۆلی باران بارین ناوچەكانی هەرێمی كوردستان دەگرنەوە و پلەكانی گەرما نزم دەبنەوە.
ئاراس جەبار، شارەزای كەشناسی بۆ (خەڵك) ڕایگەیاند، سبەی سێ شەممە 5/3/2024 ئاسمانی ھەرێم بەزۆری ساماڵ و پەڵە ھەور ئەبێت و کەش سەقامگیر ئەبێت، هەروەها پلەکانی گەرما بەراورد بە ئەمڕۆ بەڕێژەی 1 پلە بەرزدەبێتەوە و خێرایی با لەسەرخۆ ئەبێت 5-15کم لە كاتژمێرێكدا.
ڕاشیگەیاندووە، لە ئێوارەی دوو سبەی ڕۆژی چوار شەممەوە لەئەنجامی ھاتنی نزمە پاڵەپەستۆیەکی نوێ لەدەریای ناوەڕاستەوە و شەپۆلێکی ھەورە بروسکە و بارانبارین ناوچەکانمان دەگرێتەوە و سەرەتاش کاریگەریەکانی لەسەر ناوچەکانی پارێزگای دھۆک و بەتایبەت ناوچە شاخاوبیەکانی سنوورەکە و شاخاوییەکانی پارێزگای ھەولێر دەرەکەوێت.
ڕوونیشی كردۆتەوە، بەگشتی کاریگەری ئەم شەپۆلە بۆ سەر ناوچەکانی دیکەی ھەرێم لاواز ئەبێت و تەنھا لە ناوچە شاخاوییەکان ئەگەری بارانی مامناوەند ئەبێت و پلەکانی گەرماش کەمێک نزمدەبنەوە و تا ئێوارەی ڕۆژی پێنج شەممە 7/3/2024 بەردەوامی ئەبێت .
ئاماژەی بەوەشكرد، قۆناغی دووھەمی ئەم شەپۆلە، کە بەھەمان شێوە سەرچاوەکەی نزمە پاڵەپەستۆیەکانی دەریای ناوەڕاستە ھەفتەی داھاتوو ڕۆژی شەممە 9/3/2024 دەستپێدەکاتەوە و لەم قۆناغەدا بۆ زۆربەی ناوچەکان پێشبینی بارانی مامناوەند و باش ئەکرێت لەگەڵ نزمبوونەوەی زیاتری پلەی گەرمی و کاریگەری ئەم شەپۆلەش دوو بۆ سێ ڕۆژ ناوبەناو بەردەوامی ئەبێت.
