کەمێك لەمەوبەر ئیدریس مەسعود، ئەو نانەوایەی کە بە هۆی دەربڕینی ناڕەزایی لە دژی هەرزانکردنی نرخی نان و سەموون، لە هەولێر دەستبەسەر کرابوو، ئازاد کرا.
ئەمڕۆ سێشەممە، ئاسۆ هاشم، سەرۆکی تیمی پارێزەرانی خۆبەخش لە لێدوانێکیدا بۆ “خەڵك” هەواڵی ئازادکردنی ئیدریس مەسعودی پشتڕاستکردەوە.
سەبارەت بە چۆنێتی ئازادکردنەکەشی وتی: “هەر پەڕاوی بۆ نەکرابووەوە”.
دوێنێ لە کاتی گردبوونەوەی ناڕەزایی دژی هەرزانکردنی نرخی نان و سەموون لە هەولێر، نانەوایەك بە ناوی ئیدریس مەسعود، بە توندی دژی ئەو هەنگاوەی حکومەتی هەرێم قسەی کرد و داوایکرد چاکسازی لە سەرەوە دەستپیبکات نەك گوشار لەسەر نانەواخانە و فڕنەکانی سەموون دروست بکەن.
چەند کاتژمێرێك دوای بڵاوبوونەوەی قسەکانی لە تۆرە کۆمەڵایەتییەکاندا، ئیدریس مەسعود لەلایەن هیزێکی ئەمنیی هەولێرەوە دەستگیرکرا و دواتر 24 پارێزەری خۆبەخش ئامادەییان بۆ بەرگریکردن لە دۆسیەکەی ڕاگەیاند.
