مامۆستایانی ناڕازی لە دوای داواکەرییەکەی ئەنجومەنی بەڕێوەبەرایەتی گشتی پەروەردەی سلێمانی ڕوونکردنەوەیەکیان بڵاوکردەوە و دەڵێن” تا چارەسەڕی ڕیشەیی بۆ پرسی مووچە درێژە بە بایکۆت ناڕەزایەتیەکان دەدەین”.
ئەمڕۆ پێنج شەممە23 ی تشرینی دووەمی 2023، مامۆستایانی ناڕازی وەڵامای ئەنجومەنی بەڕێوەبەرایەتی گشتی پەروەردەی سلێمانی یان دایەوە و ڕایانگەیاند، بەردەوام دەبن لەسەر بایکۆت تا پرسی مووچە و شایستەکانی ترمان جێبەجێدەکرێت،
مامۆستایانی نارازی لە روونکردنەوەکەیاندا ئاماژە بەوە دەکەن،ئێمە لە نوێنەرانی مامۆستایانی سەرجەم شاروشارۆچکەکان، لێرەوە ڕای دەگەیەنیین بەهیچ شێوەیەک سازش لەسەر ماف و داواکارییەکانمان ناکەین و تا چارەسەڕی ڕیشەیی بۆ پرسی مووچە درێژە بە بایکۆت ناڕەزایەتیەکان دەدەین.
روونیشیان کردۆتەوە، کە ئەوان ئاواتەخوازبوون ئەنجوومەنی بەڕێوەبەرایەتی گشتی پەروەردە لەجیاتی داوای شکاندنی بایکۆت لەمامۆستایان ، داوای لە حکومەتی هەرێم بکردایە ئەو داواکارییانەی مامۆستایان جێبەجێ بکات کە جێبەجێکردنیان لە ئەستۆی حکومەتی هەرێمی کوردستانە،
داواکارییەکانی مامۆستایان بریتین لە :
١ــ دەسپێکردنەوەی پلەبەرزکردنەوە
٢ـ دامەزراندنی مامۆستایانی وانەبێژ
٣ ــ دیاریکردنی چارەنوسی مووچە پاشەکەوتکراوەکانمان .
٤ـ دیاری کردنی چارەنوسی سێ مووچەی سێ مانگی کۆتایی ئەمساڵ .
ڕاشیان گەیاند، بۆ درێژەدان بە ناڕەزایەتیەکان ڕۆژی یەکشەممە مامۆستایان ناڕەزایەتیەکان دەبەنە بەغدای پایتەخت و لەگەڵ گەڕانەوەشیان لێرە بەگوڕێکی تر ناڕەزایەتیەکان دەست پێدەکەنەوە،دووبارە ڕایدەگەیەنین، بایکۆت بەردەوامە ، بۆ ئەوەی کاتێکی تر و ساڵێکی تر بایکۆت نەکەینەوە .
ماوەی زیاتر لە دوو مانگە مامۆستایان و مامۆستایانی وانەبێژ و بەشێک لە فەرمانبەران بایکۆتی دەوامیان کردووە و داوای پلەبەرزکردنەوە و دامەزراندن و یەکلایی کردنەوەی پرسی مووچە دەکەن، بڕیاریشە ڕۆژی یەک شەممە بچنە بەغدا و لە مەیدانی تەحریر خۆپیشاندان ئەنجام بدەن.
