سەرۆکی حکومەتی هەرێمی کوردستان لەمیانی دیدارە تایبەتەکەی لە دووەم رۆژی چوارەمین کۆڕبەندی ئاشتی و ئاسایشی رۆژهەڵاتی ناوەڕاست (مێپس 2023) ڕایگەیاند ، ڕۆژنامەوانی کارێکی شکۆدارە و ئەوان لێرە ئازادن و ڕۆژانە ڕەخنە لە حکومەتەکەم دەگرن.
مەسرور بارزانی ڕاشیگەیاند، جیاوازی هەیە لە نێوان کاری ئازادی ڕۆژنامونووسی و بێ سەرو بەرەییدا، ئێمە ئازادیمان بۆ کاری ڕۆژنامەنووسی فەراهەم کردووە، ئەوان زۆر چالاکن لە هەرێم و کاریگەری تەواویان هەیە،
وتیشی، من ناتوانیم لەسەر کاری ڕۆژنامەوانی لە عێراق قسەبکەم، تەنها دەتوانم باسی هەرێم بکەم، لێرە ڕۆژنامەوانی کارێکی شکۆدارە، ئەوان مافی خۆیانە ڕەخنە بگرن و زانیاری دروست بگوازنەوە،بەو هیوایەین ڕەخنەکانیان بۆ دەرخستنی کەم و کوڕی و خزمەتکردنی هەرێم بن ، ئێمە سودیان لێ وەربگرین و کەمتەرخەمییەکانمان ببینین، تاوەکو بتوانین کارەکان چاک بکەینەوە و خزمەتی زیاتر بکەین،
مەسرور بارزانی دەشڵێت، ئەوانەی باسی پاشەکشەی ئازادی کاری ڕۆژنامەوانی دەکەن با بەداتا قسە بکەن ، ئێمە گەلێک جاران وتومانە گواستنەوەی دروستی زانیاری لەگەڵ کاری بێ سەرەو بەرەیدا جیاوازییان هەیە، با ئێمە بەراورد بکەین لە ماوەی ١٠ ساڵی ڕابردودا کاری ڕۆژنامەوانی چۆن بووە و ئێستا چۆنە.
وتیشی”هەموو کەس لەبارەی ئازادی ڕادەربڕین قسە دەکەن، ئەی باسی بوون چییە ئێمە وەک گەلێک مافی ئازادیمان هەیە، ئێمە لێرەدا دەبێت باسی ئازادی گەلێک بکەین نەک تاکێک ، وتەکانم بۆ ئەوە نییە یەکێکیان بکرێتە قوربانی ئەوی تر بەڵکو دەبێت هەردوکیان فەراهەم بکرێت”.
چوارەمین کۆڕبەندی ئاشتی و ئاسایشی رۆژهەڵاتی ناوەڕاست بۆ ماوەی سێ رۆژ لە زانکۆی ئەمەریکی کوردستان لە دهۆک بە بەشداری زیاتر لە 300 کەسایەتی سیاسی، ئەکادیمی، ئەمنی و شارەزای ئابووری و تەکنەلۆژیا و بوارە جیاوازەکان لە 80 وڵاتەوە بەڕێوەدەچێت.
