هاووڵاتییەك لە سنووری گەرمیان کوژرا و کەسوکارەکەی بە پۆلیسیان ڕاگەیاندووە کە ماتۆڕسوارێك تەقەی لێکردووە.
ئەمڕۆ سێشەممە، بەڕێوەبەرایەتی پۆلیسی گەرمیان ڕایگەیاند، بەیانی ئەمڕۆ لە گوندی کوڵەجۆ سەر بە ناحیەی کۆکزە هاووڵاتییەك بە برینداری گەیەندرایە نەخۆشخانەی فریاکەوتنی شەهید هەژار لە کەلار و لەوێ گیانی لەدەستدا.
ڕوونیشیکردەوە، هاووڵاتییەکە لەدایکبووی 1979-ە و بە وتەی کەسوکارەکەی ماتۆڕسوارێك لە نێو کوڵەجۆ تەقەی لێکردووە.
پۆلیسی گەرمیان ڕاشیگەیاند، لێکۆڵینەوە دەربارەی ڕووداوەکە دەستیپێکردووە و لە هەولدان بۆ دۆزینەوەی تۆمەتبارەکە.
