ڕۆژی شەممە، دابەشکردنی نەوت لە مەڵبەندی ٨ لەلایەن بەڕێوەبەرایەتی نەوت و کانزاکانی سلێمانی دەستیپێکرد، کە چەند گەڕەکێک دەگرێتەوە.
دابەشکردنی نەوتی سپی لە سنووری پارێزگای سلێمانی بەردەوامە، لە گەڕەکی ووڵوبەی شاری سلێمانی کە دەکاتە مەڵبەندی ٨ هاووڵاتیان لە چاوەڕوانی وەرگرتنی نەوتدان، هەر خێزانێک بڕی ٢٠٠ لیتر (یەک بەرمیل) نەوت وەردەگرێت و بە نرخی ١٠٣ هەزار و ٥٠٠ دینار پێیان دەفرۆشرێت.
ڕۆژانە چەند تەنکەرێک نەوت بۆ گەڕەکەکان دەنێردرێت تا نەوت بەسەر هاووڵاتیان دابەشبکات، بەهۆیەوە قەرەباڵغی دروستبووە و هاووڵاتیان ماوەی هەفتەیەکە چاوەڕوانی وەرگرتنی نەوتن، چونکە هەر تەنکەرێک ٧٥ بەرمیل نەوتی پێیە و دابەشی دەکات.
هاووڵاتیان ئاماژەیان بەوەکرد لە ٢٠١٦ ەوە نەوتیان وەرنەگرتووە بەرمیلێک نەوت بۆ زستانی خێزانێک سوودی لێنابینرێت، ” ماوەی ٩ ساڵ دەبێت کە نەوت دابەشنەکراوە، ئێمە ساڵانە ٣ بۆ ٤ بەرمیل نەوتمان پێویستە، نرخەکەشی زۆرە بۆ هاووڵاتیان”.
لە سنووری پارێزگای سلێمانی ٢٠ هەزار و ٨٧ بەرمیل نەوت بەسەر هاووڵاتیان دابەشکراوە، کە دەکاتە نزیکەی ٤ ملیۆن ١٥ هەزار و ٦٠٠ لیتر نەوت، لە کاتێکدا سلێمانی پێویستی بە ٥٢ ملیۆن لیتر نەوت هەیە بۆ پڕکردنەوەی پێداویستییەکانی هاووڵاتیان.
