مونا قەهوەچی، جێگری سەرۆکی پارتی چاکسازی تورکمان دەڵێت، ده‌ستبردن بۆ كورسی پێكهاته‌كان قابیلی قبوڵكردن نییه و ئێمە داوامانکردووە کورسییەکانمان لە پێنج کورسییەوە بۆ بکرێت بە ١٠کورسی.
مونا قەهوەچی، جێگری سەرۆکی پارتی چاکسازی تورکمان بە كوردستان24-ی رایگه‌یاند، له‌هه‌رێمی كوردستان پێكه‌وه ژیانێكی به‌رجه‌سته كراو بوونی هه‌یه، وایكردووه تابلۆیه‌كی جوان پیشانی كۆمه‌ڵگه‌ی نێوده‌وڵه‌تی و وڵاتانی ناوچه‌كه بدات.
دەشڵێت:”بوونی پێكهاته‌ی توركمان له‌هه‌رێمی كوردستان هه‌رگیز مه‌ترسی نه‌بووه، به‌ڵكو به پێچه‌وانه‌وه پێكهاته‌ی توركمان قه‌واره‌ی هه‌رێمی كوردستانی پاراستووه”.
مونا قەهوەچی، هۆشداریشیدا، ئه‌گه‌ر بێت و دادگای ئیتیحادی عێراق دژی پێكهاته‌ی توركمان و پێكهاته‌كانی دیكه هه‌ر بڕیارێك بدات، ئه‌مه واتای سڕینه‌وه‌ی ناسنامه‌ی نه‌ته‌وه‌یه‌كه كه دووه‌م نه‌ته‌وه و ناسنامه‌ی هه‌رێمی كوردستانه و سێیه‌م نه‌ته‌وه‌ی عێراقیشه و كاردانه‌وه‌ی گه‌وره‌ی لێده‌كه‌وێته‌وه.
قه‌هوه‌چی ئاماژه‌ی به‌وه‌شكرد، ده‌ستبردن بۆ كورسی پێكهاته‌كان قابیلی قبوڵكردن نییه و ئه‌مه جه‌ختكردنه‌وه‌یه له‌و مافه‌ی كه به یاسا رێكخراوه و گه‌ڕانه‌وه بۆ یاسای ژماره یه‌كی ساڵی ١٩٩٢ واته سڕینه‌وه‌ی پێكهاته و بوونی سیاسی توركمانه”.
ئەمڕۆ سێشەممە، مونا قەهوەچی، جێگری سەرۆکی پارتی چاکسازیی تورکمان لە کۆنفرانسێکی رۆژنامەوانیدا رایگەیاند، سیستمی کورسی کۆتا بە یاسا دەستەبەرکراوە بۆ پێکهاتەکان و مەبەستی سەرەکیش لە پێدان و دابینکردنی کورسی کۆتا بۆ پێکهاتەکان بۆ پاراستنی ماف و گوزارشتکردن لە ویستەکانیان و بەرگریکردن لە مافەکانی خۆیان بووە؛ بۆیە گرنگە کە سیستەمی کۆتا لە ئێستادا وەکو خۆی بمێنێت و لەمڕۆوە پاشەکشە نەکرێت.
