بە هۆی پەرەسەندنی شەڕەکەی نێوان ئیسرائیل و بزووتنەوەی حەماس، نرخی نەوت و زێڕ لە بازاڕەکانی جیهاندا بەرزبووەوە.
ئەمڕۆ چوارشەممە، نرخی یەك بەرمیل نەوتی خاوی برێنت گەیشتە 91 دۆلار و 62 سەنت و نرخی یەك بەرمیل نەوتی خاوی ئەمریکیش بۆ 88 دۆلار و 55 سەنت بەرزبووەوە.
هاوکات نرخی زێڕیش دەستی بە هەڵکشان کردەوە و یەك ئۆنسە گەیشتە هەزار و 942 دۆلار، ئەمەش لە کاتێکدایە کە دوێنێ تا هەزار و 912 دۆلار دابەزی.
هۆکاری هەڵکشانی نرخی نەوت و زێڕ بۆ پەرەسەندنی شەڕی نێوان ئیسرائیل و بزووتنەوەی حەماس دەگەڕێتەوە، بە تایبەتیش دوای بۆردومانکردنی نەخۆشخانەیەکی غەززە کە کوژرانی زیاتر لە 500 کەسی لێکەوتەوە.
