ئەنجومەنی باڵای مامۆستایانی یەكگرتوو بەیاننامەیەك بڵاودەكاتەوە لەسەر كردنەوەی دەرگای قوتابخانەكان و دواكەوتنی مووچەی مامۆستایان و فەرمانبەران ، و دەڵێت “بەگیرفانی بەتاڵەوە زیان بەکردنەوەی دەرگای خوێندنگا دەگات و پێمان باشە دوابخرێت”.
ئەنجومەنی باڵای مامۆستایانی یەكگرتوو رایدەگەیەنێت: وادەی كردنەوەی دەرگای ناوەەندەكانی خوێندن نزیكە و مامۆستایان و قوتابیان و دایكان و باوكان لە چاوەڕێی دەستپێكی ساڵی نوێی خوێندندان، بەڵام بەداخەوە هەروەك چۆن هەرساڵێك و بە هۆكار و بەهانەیەك كێشەو قەیران بۆ ڕەوتی خوێندن دروست دەكرێت، ئەمساڵیش بەهۆی بێباكی و بێپلانی و ناشەفافی داهاتی حكومەتی كاربەرێكەری هەرێم و، هاوكات نەناردنی بەشەموچەی فەرمانبەرانی هەرێم لەلایەن عێراقەوە، ئاسۆی مزگێنی باش بۆ ساڵی نوێی خوێندن نابینرێت.
مامۆستایانی یەكگرتوو دەڵێت: لەم ساتەوەختە هەستیار و گرنگەدا، وەك هەمیشە لە پێشەنگی بەرەی داكۆكیكردن لە مافەكانی مامۆستایانداین و، داخوازی پێدانی هەردوو موچەی مانگەكانی 7 و 8ی موچەخۆرانین لەو میانەدا پێمان وایە كردنەوەی دەرگای ناوەندەكانی خوێندن بەو قەیران و تەنگژە زۆرانە و، گیرفانی خاڵی مامۆستایان و موچەخۆران و خانەوادەی قوتابیانەوە بەگشتی، سەرەتایەكی خراپ و پڕ ئازار دەبێت بۆ پرۆسەی فێركردن و، داخوازی دواخستنی دەستپێكی ساڵی نوێ دەكەین تا موچە دابەشدەكرێت.
مامۆستایانی یەكگرتوو دەستخۆشی و پشتگیری ئاراستەی هەوڵەكەی یەكگرتووی یەكگرتووی ئیسلامی كوردستان دەكەن كە لەسەر ئەو ستەمە گەورەی دژ بە موچەخۆرانی هەرێم كراوە، سكاڵای یاسایی لە دادگای فیدراڵی تۆمار دەكات.
