کەسانی بەهرەمەند لە هەر شوێن و جێگایەکدا بن، بەرهەمیان هەیە و سوود بە دەوروبەر و کۆمەڵگەکەیان دەگەیەنن.
ئەو کەسە بەهرەمەندانە هەردەم پشت بەخۆیان دەبەستن و بیرۆکەی خۆیان دەخەنە کار، بۆیە جیاواز لە کەسانی دەوروبەریان زیاتر تیشک دەخەنە سەر ئەو کارەی خولیای خۆیانە و هەموو هەوڵێک دەدەن تیایدا سەرکەوتووبن.
بەڵێن ئیبراهیم (٢٨ ساڵ)، یەکێکە لەو گەنجە بەهرەمەند و دەستڕەنگینانەی لە گوندی بێلولە دەژی، کە سەربە ناحیەی مەیدان-ە لە قەزای خانەقینی سەر بە ئیدارەی گەرمیان.
گوندەکەی بەڵێن بەهۆی ئەوەی لەسەر سنووری عێراق-ئێرانە، پاشماوەیەکی زۆری جەنگی لێیە، هەر لە مین و تەقەمەنی هەتا جۆرەها پاشماوەی جەنگی وەک گوللەی تۆپ و هاوەند و فیشەک.
بەڵێن لەبری ئەوەی وەک زۆرێک لە گەنجان گوند جێبهێڵێت و ڕوو لە ژیانی شار بکات، پەرەی بە بەهرەکەی داوە کردوویەتیە خزمەتی ژینگە و کۆمەڵگاکەی.
بەڵێن ڕۆژانە و بەپێی پێویستی شاخ و گرد و دەشتەکانی گوندەکەی دەگەڕێت و ئەو پاشماوانەی جەنگ لە کانزاکان کە زیانێکی زۆر بە ژینگە و سروشت دەگەیەنن کۆدەکاتەوە و، لە نێو وەرشەیەکی بچووکدا کە لە ماڵەکەی خۆی دروستی کردووە، دەیانکات بە شتانی سوودبەخش.
بە کۆکردنەوەی پارچەی تۆپ و گوللە هاوەن و قاوەنی فیشەك، بەڵێن چەقۆی ناوازە دروست دەکات کە داخوازییەکی زۆری هاووڵاتیانی لەسەرە.
وەک بەڵێن باسی دەکات، ماوەی شەش ساڵە دەستی بەو کارە کردووە کە چەقۆسازییە و لەسەر خواست چەقۆی هەمەجۆر دروست دەکات کە کوالیتییەکی زۆر باشی هەیە.
بەڵێن سەبارەت بە کارەکەی ڕایگەیاند: ”سەرەتای دەستپێکردنی ئەم کارەی من دەگەڕێتەوە بۆ ساڵی ٢٠١٧، ئیشەکەی من بریتییە لە ئیشی چەقۆسازیی، بەزۆری چەقۆی گیرفان و چەقۆی قەسابی و چەقۆی ماڵان دروست دەکەم، جاروباریش حەربە و خەنجەر دروست دەکەم”.
بەهۆی ئەوەی ناوچەکەیان نزیکترین خاڵی سنووریە و چەند سەد مەترێک لە سنووری ئێرانەوە دوورە، جەنگی عێراق-ئێران لەو ناوچەیە زۆر چڕ بووە و بۆردومانێکی زۆر کراوە، بەو هۆیەشەوە پاشماوەیەکی زۆری تەقەمەنی لێیە، بەڵێنیش ئەو پارچانەی بە کەڵکی کارەکەی دێن کۆدەکاتەوە و چەقۆ و کەرەستەکانی دیکەیان لێ دروست دەکات.
بەڵێنی بەهرەمەند کار بە پاشماوەی تەقەمەنییەکان دەکات بۆ دروستکردنی چەقۆکان و وەک خۆی دەڵێت: ”ئەو پارچانەی گوللە تۆپ و هاوەن و ئەوانەی دیکە کە بەکاریان دەهێنم هیچ زەرەر و زیانێکیان نییە، واتە پوچەڵ بوونەتەوە و تەقیون، ئەگەر مینێک ساغ بێت یان ترەقەی تێدا مابێت من بە دەوریاندا ناچم، بینیومن و لە ناوچەی ئێمە هەیە، بەڵام من ئەوانە بەکاردەهێنم کە هیچ مەترسییەکیان لەسەر نەماوە و هیچ کێشەیان نییە”.
ئەوەی بووەتە جێی سەرنج، بەڵێن لە وەرشەکەیدا بە ئامێری سادە و دروستکراوی دەستی خۆی کارەکانی دەکات و خۆشەویستی بۆ کارەکەی، لە جوانی و ڕەونەقی بەرهەمەکانیدا ڕەنگی داوەتەوە.
وەک بەڵێن باسی دەکات، بوونی ژمارەیەکی زۆر مین و پاشماوەکانی جەنگ لە شاخ و گێڵگەکانی گوندی بێلولە کە هاوسنوورە لەگەڵ ئێران، زیانێکی زۆری بە خەڵکێکی ناوچەکە گەیاندووە و بەهۆیەوە ژمارەیەکیان گیانیان لەدەستداوە و برینداربوون و بەهۆی لەدەستدانی دەست و قاچ و چاویان بوونەتە خاوەن پێداویستی تایبەت.
بەڵێن باس لەوە دەکات کە ئەو چەقۆ دروست ناکات و بۆ فرۆشتن دایانبنێت یان بۆ بازاڕ کار ناکات، بەڵکو لەسەر خواستی خەڵک کار دەکات و لە هەموو شارەکانی هەرێم و عێراق و دەرەوەی وڵاتیش خواست لەسەر بەرهەمەکانی هەیە و گوتی: ”هەر لە خانەقینەوە هەتا دهۆک و زاخۆ خەڵک داوای دەکات و، بەگشتیی بۆ هەموو شارەکانی دەنێرم. بەپێی داواکاری خەڵک ئیشەکان دەکەم. هەتا بۆ دەرەوەی وڵاتیشم ناردووە، هەر ئەم ماوەی ڕابردووە ڕەنگە ٤٠-٥٠ چەقۆم دروست کردبێت و ناردبێتم بۆ دەرەوەی وڵات”.
هەروەها بەڵێن ئاماژەی بەوە کرد کە ئەو هەموو شێوازێکی چەقی دروست ناکات، بەتایبەتی کە بۆ شەڕ و خراپەکاری بەکاربێت، بە هیچ نرخێک ئەو جۆرە چەقۆیانە دروست ناکات، بەڵکو کارێک دەکات کە سوودی بۆ کۆمەڵگا هەبێت.
گوتیشی: “هەندێک جار ئەو حەربانەی من دروستیان دەکەم هەر کاریشی پێ ناکرێت، تەنیا بۆ جوانییە و خەڵکی هەر بۆ جوانی دایدەنێت”.
ئەوەی بەرهەمی کارەکەی بەڵێن جیادەکاتەوە لە بەرهەمەکانی دیکە، وردی کارکردنێتی لەسەر چەقۆکان، کە بۆ هەر یەکێکیان کاری تایبەت دەکات و لەسەر خواستی کڕیار دروستیان دەکات، بۆ دەسکی چەقۆکانیش شاخی ئاژەڵ بەکاردەهێنێت، چونکە بە گوتەی بەڵێن شاخی بەران جوانە و ڕەنگی تایبەتی هەیە.
