سەرۆك وەزیرانی عێراق بڕیاری پێکهێنانی لیژنەیەکی هەمیشەیی دا بۆ چاودێریکردنی کاری کۆمپانیا و بانکەکان.
ئەمڕۆ پێنجشەممە، نووسینگەی سەرۆك وەزیرانی عێراق بڵاویکردەوە، محەمەد شیاع سودانی فەرمانی بە هەموو دامەزراوە پەیوەندیدارەکان کرد پابەند بن بە کارکردن بەپێی یاسای بانکی ناوەندی عێراق ژمارە 56 ی ساڵی 2004 کە ئاماژەی کردوە بەوەی بانکی ناوەندی عێراق تاکە لایەنە دەسەڵاتی گرتنەبەری هەموو ڕێوشوێنەکانی ڕێکخستن و چاودێری کاری بانکەکان ودامەزراوە داراییەکانی هەیە بە پێی ڕێنمایەکانی بانکی ناوەندی.
ڕوونیشیکردەوە، بڕیارەکە لە چوارچێوەی دووپاتکردنەوەی بەرنامەی حکومەتدا دێت بۆ بەردەوامبوون لە چاکسازی لە کەرتی دارایی و بانکی و تەواوکردنی هەوڵەکانی لایەنی چاودێری و دامەزراوە داراییە پەیوەندیدارەکان بە شەفافیەت و ودەستپاکیەوە.
ڕاشیگەیاند، کۆمەڵەی کۆمپانیاکانی ئاڵوگۆڕ بەڵێنیان دا حەوت ڕۆژ لە هەفتەیەکدا کاربکەن بۆ فرۆشتنی دراوی بیانی بە هاووڵاتییان بە نرخێکی فەرمی کە پەسەندکراوە، بەپێی کۆنترۆڵ و ڕێنماییەکانی بانکی ناوەندی.
ئەوەشخرایەڕوو کە بۆ چاودێریکردنی کارەکانی کۆمپانیا و بانکەکان، بڕیار درا لیژنەیەکی هەمیشەیی پێکبهێنرێت کە نوێنەرانی بانکی ناوەندی و نووسینگەی سەرۆک وەزیران و کۆمەڵەی کۆمپانیاکانی ئاڵوگۆڕ لەخۆ بگرێت بۆ چارەسەرکردنی بەربەستەکان لە کارەکانی ئەم کەرتەدا.
