نوێنەری گشتی مامۆستایانی وانەبێژان لەهەرێمی کوردستان رایگەیاند، دەبێت حکومەت دەست بە دامەزراندنی مامۆستایانی وانەبێژ بکات، چونکە ئێستا بەغدا پارە دەنێرێت و هیج ئاستەنگێک نەماوە بۆیە ئەگەر بەدەم داواکارییەکەمانەوە نەیات هەڵوێستی توندمان دەبێت پێش دەستپێکردنی پرۆسەی خوێندنی ساڵی نوێ.
عەلی رەئوف، نوێنەری گشتی مامۆستایانی وانەبێژ لە تۆڕی کۆمەڵایەتی فەیسبووک نووسیویەتی:”هەرێمی کوردستان مانگانە لە بەغداوە نزیکەی ترلیۆنێک و ٤٠٠ ملیار دینار بۆ دێت، هەرێم نیوەی داهاتی ناوخۆی بۆ دەمێنێتەوە کە بڕەکەی ٢٥٠ ملیار دینارە و مانگانەش هاوپەیمانان ٣٢ ملیار دیناری بۆ دەخەنە سەر حیساب بۆ مووچەی پێشمەرگە ، موچەی دوو لیوای پێشمەرگەش ڕاستەخۆ دەخرێتە سەر بەغدا”.
لەبەشێکی تری نووسینەکەیدا دەڵێت:”هەرێم مانگانە زیاتر لە ٤٥٠ملیار دیناری بۆ دەمێنێتەوە، بۆ دامەزراندنی سەرجەم مامۆستایانی وانەبێژ پێویستی بە ٧ ملیار دینارە، بۆیە لە ئێستادا کێشەی دارایی لە هەرێمی کوردستان نەماوە ، پێویستە حکومەتی هەرێم بەدەم داواکاری مامۆستایانی وانەبێژ بێت کە دامەزراندن و بوون بەهەمیشەییە ، ئەگەر نا هەڵویستی توندمان دەبێت ناڕەزایی دەردەبڕین پێش دەستپێکردنی خوێندنی ساڵی ٢٠٢٣-٢٠٢٤”.
ماوەی زیاتر لە ١٠ ساڵە مامۆستایانی وانەبێژ داوای دامەزراندن دەکەن بەڵام بەهۆی ئەو قەیرانانەی کەهەرێمی کوردستانی گرتووەتەوە، هیچ جۆرە دامەزراندنێک نییە بۆ وانەبێژان و دەرچوانی زانکۆ و پەیمانگاکان.
