لە سنووری شاری ئامەدی باكووری كوردستان لە ژێر باڵەخانەیەكی داڕووخاودا زیاتر لە 100 كەس ماون و هەوڵی ڕزگاركردنیان دەدرێت لەلایەن تیمەفریاگوزارییەكانەوە.
ئاژانسی میزۆپۆتامیا بڵاویكردەوە، لە باڵەخانەیەكی 7 بۆ 8 نهۆمی لە ناوچەی رەزانەی شاری ئامەد داڕووخاوە و زیاتر لە 100 كەس لە ژێر داروپەردووی باڵەخانە ڕووخاوەكەدان.
لە ناوچەی پەزارچەك لە پارێزگەی مەڕەش بەلایەنی كەمەوە 140 باڵەخانە هەرەسیان هێناوە و تا ئێستا تەرمی 23 كەس دۆزراونەتەوە و 420 كەسیش بریندارن، ئەم ناوچەیە ناوەندی بوومەلەرزەیەكی 7.4 پلەی ڕێختەر بوو كە زۆرینەی شارەكانی باكووری كوردستان و ڕۆژئاوای كوردستان و بەشێكی توركیا و سووریای گرتەوە و لە هەرێمی كوردستانیش هەستی پێكراوە.
لە پارێزگەی ڕەحا لە باكووری كوردستان 16 باڵەخانە ڕووخاون، 10 كەس لە ژێر باڵەخانە ڕووخاوەكان گیانیان لەدەستداوە و 110 كەسیش بریندارن.
لە عەفرینی ڕۆژئاوای كوردستان تا ئێستا 51 كەس گیانیان لەدەستداوە.
بەپێی ئامارە بەراییەكان لە ڕۆژئاوای كوردستان و سووریا 237 كەس گیانیان لە دەستداوە و زیاتر لە 639 كەسیش بریندار بوون.
پارێزگاری ماڵاتیا، خوڵوسی شاهین ئاماژەی بەوە كرد، تا ئێستا ٢٣ كەس بەهۆی بوومەلەرزەكەوە گیانیان لەدەستداوە و٤٢٠ كەس برینداربوون و ١٤٠ بیناش داڕووخاون.
پارێزگاری عەنتاب، داود گول ڕایگەیاند، ”لە ساتی ڕوودانی بوومەلەرزەكەوە ٦٥٧ هەواڵمان پێگەیشتووە، هەڵسەنگاندن بۆ هەمووی كراوە، لە سەرانسەری پارێزگاكەدا ٥٣١ داڕووخان روویداوە”.
