سەرۆكی حكومەتی هەرێم ڕایدەگەیەنێت ، خواستمان نیە ئەنجومەنی وەزیران ببێتە شوێنی كێشە و هەموو بەشداربووان لەكابینەی نۆیەم هەر گرفت و ڕەخنەیەكیان هەیە دەتوانن لە نێو كۆبونەوەكان باسی بكەن، دەشڵێت،”ئەوانەی بەرژەوەندی وڵاتەكە و میللەتەكەیان لاگرنگە هیوادارام بێن و بەشداری كۆبونەوەكان بكەنەوە”.
مەسرور بارزانی، سەرۆكی حكومەتی هەرێم لە داڤۆسەوە بۆ ڕۆژنامەنوسان ڕایگەیاند، من پێم سەیرە برادەرانی یەكێتی بایكۆتی كۆبونەوەكانی ئەنجومەنی وەزیران دەكەن و بەهیچ شێوەیەك پێمان باش نیە ئەنجومەنی وەزیران ببێتە شوێنی كێشە و هەموو بەشداربووان لەكابینەی نۆیەم هەر گرفت و ڕەخنەیەكیان هەیە دەتوانن لە نێو كۆبونەوەكان باسی بكەن.
وتیشی،”داوامان كردووە تۆمەتبارانی كەیسی هاوكار جاف ڕادەستی دادگا بكرێت و بۆیە بەتەسلیم كردنی ئەو تۆمەتبارانە گرێ كوێرەی كێشەكان دەكرێتەوە و بە پێكهێنانی لیژنەی لێكۆڵینەوە و دەست بە هەموو قسەیەك بكەینەوە”.
ڕاشیگەیاند، حكومەتی هەرێم حكومەتی هەموو هەرێمی كوردستانە و هیچ ناوچەك جیاواز نیە لە ناوچەیەكی دیكە، ناكرێت بۆ بابەتێكی سیاسی و شەخسی ناوچەگەرایەتی بكرێت .
داواشیكرد ، كە ئەوانەی بەرژەوەندی وڵاتەكە و میللەتەكەی لا گرنگە ، هیوادارم بێن ئەركی نیشتمانی خۆیان بەجێ بێنن و بەشداری كۆبونەوەكانی ئەنجومەنی وەزیران بكەنەوە .
