وەزیری پەروەردە بەڕێوەبەرایەتییە گشتییەکان ئاگادار دەکاتەوە کە لە ماوەی حەوت ڕۆژدا وردبینی لە لیستی ناوی وانەبێژان بکەن.
ئەمڕۆ دووشەممە، ئالان حەمەسەعید، وەزیری پەروەردە نووسراوێکی ئاڕاستەی سەرجەم بەڕێوەبەرایەتییە گشتییەکانی پارێزگەکان و ئیدارە سەربەخۆکان و خوێندنی کوردی لە کەرکووک کرد سەبارەت بە مامۆستایانی وانەبێژ.
لە نووسراوەکەدا هاتووە کە لیستی ناوی مامۆستایانی وانەبێژی دانەمەزراویان بۆ ڕەوانە دەکەن و ماوەی حەوت ڕۆژیان لەبەردەستدایە بۆ ئەوەی بە بێ کەموکوڕی وردبینی لە ناوەکان بکەن و بیگەڕێننەوە بۆ بەڕێوەبەرایەتی گشتی دیوانی وەزارەت.
ئامانج لە وردبینییەکە بەهەمیشەییکردنی گرێبەستی مامۆستایانی وانەبێژە کە بڕیارە لەسەر داهاتی ناوخۆ مووچەکانیان بۆ دابین بکرێت.
