پارێزەری دۆسیەی مووچەی فەرمانبەرانی هەرێم لە دادگای فیدڕاڵی لەسەر دواكەوتنی مووچەی مووچەخۆرانی هەرێم داوا لە حكومەتی هەرێم دەكات، ” لەکاتی خۆیدا مووچە بەخەڵک بدەن، باناچار نەبین بڕۆینەوە بەردەم دامەزراوەی دادوەریی عێراق و ئەوەی ماوە تەواویی بکەین”.
بەكر حەمەسدیق، پارێزەری دۆسیەی فەرمانبەران لە پەیامێكدا بۆ حكومەتی هەرێم ڕایگەیاندووە، تکاتان لێدەکەین بەخێرایی کۆتایی بە پرۆسەی دواخستنی موچەخۆران بهێنن و بەزەییتان بەو خەڵکە هەژارەدا بێتەوە کەجگە لەمووچە هیچ سەرچاوەیەکی بژێویی تریان نیە.
ئاماژەی بەوەشكردووە، دەبێ پشتیوانیی خەڵکی خۆتان بن، وەگەرنا دورنیە جارێکی دیکە بانگی بەردەم دادگا بکرێنەوە و ئەمجارەشیان خەڵک داوای ترتان لەسەر تۆماربکات ،یان هەر جۆرە ڕێ و شوێنێکی یاسایی تر لەدژتان بگیرێتەبەر، چونکە ئەو کاری دواخستنە بەتەواویی هەموو خەڵکی ماندوو کردوە.
دەقی پەیامەكە:
بەڕێزان…
سەرۆکی حکومەتی هەرێم
جێگری سەرۆکی حکومەتی هەرێم
سڵاو…بەدەر لە هەرجۆرە موزایەدەیەکی سیاسیی و پەیوەست بە هەڵمەتی هەڵبژاردن ،داوا لە بەڕێزتان دەکەم بەئەوپەڕی هەستی نیشتمانیەوە مەسەلەی دواخستنی موچەی فەرمانبەران و خانەنشینان و تۆڕی کۆمەڵایەتی چارەسەربکەن پێش ئەوەی جوڵەیەکی تری یاسایی بکەین و جەنابتان وەک جاری پێشوو خۆتان سەغڵەت بکەن و لەڕێی هەندێ میدیای سێبەریشتانەوە سوکایەتیمان پێ بکەن، تکاتان لێدەکەین بەخێرایی کۆتایی بە پرۆسەی دواخستنی موچەخۆران بهێنن و بەزەییتان بەو خەڵکە هەژارەدا بێتەوە کەجگە لەمووچە هیچ سەرچاوەیەکی بژێویی تریان نیە، دەزانم کەبەقەستی و بێ باکانە ئەوکارە دەکەن، دەشتانەوێ لەڕێگەی هەژماری منەوە ئیرادەی خۆتان بەسەر قوتی خەڵکدا بسەپێنن، دڵنیابن ئەوەشتان بۆ ناچێتەسەر، دەبێ پشتیوانیی خەڵکی خۆتان بن، وەگەرنا دورنیە جارێکی دیکە بانگی بەردەم دادگا بکرێنەوە و ئەمجارەشیان خەڵک داوای ترتان لەسەر تۆماربکات ،یان هەر جۆرە ڕێ و شوێنێکی یاسایی تر لەدژتان بگیرێتەبەر، چونکە ئەو کاری دواخستنە بەتەواویی هەموو خەڵکی ماندوو کردوە.
خۆشتان دەزانن ئێمە بەرپرسانە مامەڵە دەکەین و حەزیش ناکەین بەدوای لەکەو عەیبدارکردنی ئێوەدا بڕۆین، موزایەدەش ناکەین و بردنەوەی کەیسی فەرمانبەرانمان تەوزیف نەکردوە بۆ سنگ دەرپەڕاندن و خۆ کاندید کردن، بەڵام کەهاتینە سەر ماف و شایستەکانی خەڵک بێدەنگ نابین، خۆشتان هەڵوێستی پێشوتری ئێمەتان دیوە.
تکایە ئەو جوامێریە بکەن و بیدەنە پاڵ خۆتان، کێشەمان نیە، گرێی دەرونیمان لەگەڵ هیچ کەس و هیچ پرۆسەیەکدا نیە، تەنها لەکاتی خۆیدا موچە بەخەڵک بدەن، باناچار نەبین بڕۆینەوە بەردەم دامەزراوەی دادوەریی عێراق و ئەوەی ماوە تەواویی بکەین.
