راوێژکاری بانکە تایبەتەکانی عێراق ڕایدەگەیەنێت، چاکسازییەکانی بانکی ناوەندیی عێراق یارمەتیدەر دەبن بۆ سەقامگیریی دارایی و نەختینەیی و دەشڵێت: لە ماوەیەکی زۆر کورتدا یەک دۆلار بە 1440 بۆ1460 دینار مامەڵەی پێوە دەکرێت.
ڕەوەند میرزا لە بازاڕی دۆلارەكەی سلێمانی بۆ (خەڵك) ڕایگەیاند، ئەمڕۆ یەك شەممە نرخی 100 دۆلار بە 149 هەزار و 400 دینار مامەڵەی پێوەكراوە.
لای خۆشیەوە، سەمیر نوسەیری، ڕاوێژکاری بانکە تایبەتەکانی عێراق سەبارەت بە ناسەقامگیری بەهای دۆلار لە بازاڕدا بە ڕووداوی ڕاگەیاند، بانکی ناوەندیی عێراق کۆمەڵێک چاکسازی دەستپێکردووە: “هاووڵاتییان دڵنیا دەکەمەوە، کە لە ماوەیەکی زۆر کورتدا بەهای دینار بەرامبەر دۆلار لەنێوان 1440-1460 دینار بۆ هەر دۆلارێک دەبێت، ئەوەش بەهۆی چارەسەرکردنی زۆربەی کێشەکانەوە”.
نوسەیری پێیوایە، “ناسەقامگیریی نرخی دینار بەرامبەر دۆلار گەورەترین هەڕەشەیە لەسەر سەقامگیری دارایی؛ لە 19-12-2020 بڕیاردرا بەهای دینار بەرامبەر دۆلار بگۆڕدرێت و لەو کاتەوە ناسەقامگیری باڵی بەسەر بازاڕدا کێشاوە”.
راوێژکاری بانکە تایبەتەکانی عێراق وتیشی: “پێم وایە ئەم ناسەقامگیرییە تاوەکو تەواوکردنی سیاسەتی دارایی حکومەت و سیاسەتی بانکی ناوەندی لە بابەتی نەختینە و سیستمی بانکیدا بەردەوام دەبێت. حکومەت هەوڵ دەدات چاکسازی لە بواری داراییدا بکات و بۆ ئەوەش کارنامەکەی ئامادە کردووە، کە ئامانج لێی بەدەستهێنانی سەقامگیری ئابوورییە. ئەگەر ئەو چاکسازییانە بکرێن، ناسەقامگیرییەکە کۆتایی دێت”.
سەمیر نوسەیری ڕایگەیاند، لە سەرەتای ساڵی 2023دا حکومەت و بانکی ناوەندی دەستیان بە چاکسازی کرد و ئەوانیش بە دوو ئاراستە بوون و دەشڵێت: “بانکی ناوەندی دەستی بە دانوستاندن لەگەڵ بانکی فیدڕاڵیی ئەمریکی، وەزارەتی گەنجینەی ئەمریکا و بانکە نێودەوڵەتییەکان لە چین، ئیمارات، تورکیا و هیندستان کرد بۆ ئەوەی میکانیزمێکی نوێ بۆ بازرگانی دەرەکی بدۆزرێتەوە.”
