مەكۆی هەولێری بزووتنەوەی گۆڕان وەك هەڵوێستێك بەرامبەر بەوەی بەرامبەر بە هەڵوسوڕاوێكیان كراوە، بڕیاریدا بە پچڕاندنی پەیوەندییەكانی لەگەڵ پارتی و پارێزگاری هەولێر.
مەكۆی هەلێری بزوتنەوەی گۆڕان دەربارەی گرتنی هەڵسوڕاوێكی بزوتنەوەكە لە كۆنگرەیەكی ڕۆژنامەوانیدا ڕایگەیاند، لەم ئەمڕۆ پەیوەندیەكانمان لەگەڵ پارتی و پارێزگاری هەولێر دەپچڕێنین.
هێمن شێخانی، هەڵسوڕاوی بزوتنەوەی گۆڕان لە كۆنگرەكەدا ڕایگەیاند، تیمی پارێزەرانمان ئامادەكردوە و لە بنكەی پۆلیسی توڕەق سكاڵامان تۆماركرد، بەڵام وتەیان لێ وەرنەگرتین و وتیان ئەمە پرسێكی سیاسیە.
وتیشی، “لەم حەقەی خۆمان خۆش نابین، داواكارین یاسا سەروەر بێت و ئاسایشی پارتی داوای لێبوردن لە بزوتنەوەی گۆڕان بكات”.
جەختیشی كردەوە، “ئەوەی بەرامبەر بە هەڵسوڕاوێكی گۆڕان كرا بەهیچ شێوەیەك لێی بێدەنگ نابین”.
ئاماژەی بەوەشكرد، لە 5 ساڵی ڕابردوودا گۆڕان زۆر هەوڵیدا تاوەكو تەواوی لایەنە سیاسییەكان برا و تەبابن و ئەم بارودۆخە خراپەی بەسەر قەوارەی سیاسی هەرێمی كوردستاندا هاتووە و بەسەر هاوولاتیاندا هاتووە لەسەر مێزی گفتوگۆ چارەسەری بكەین، بەڵام كێشەكان قوڵتر بوونەوە و هەندێك وایان كرد ئەوەندەی لە خەمی گیرفانیان بن، ئەوەندە لە خەمی هاووڵاتیان نەبوون و حكومەتی هەرێم ، حكومەتێكی شكستخواردوو بوو، كە نەیتوانی لە خزمەتی خەڵكی هەرێم بێت”.
