جێگری پارێزگاری بانكی ناوەندیی عێراق ڕایدەگەیەنێت، زیادبوونی یەدەگی دراو ئاماژەیەكی دڵخۆشكەرە بۆ بانكی ناوەندیی و دەشڵێت: “لە ئێستادا یەدەگی دراوی نەختینەیی عێراق گەیشتە زیاتر لە ٩٩ملیار دۆلار و لە ماوەیەكی زۆر كەمدا دەگاتە ١٠٠ملیار”.
عەممار حەمید، جێگری پارێزگاری بانكی ناوەندیی عێراق بە ئاژانسی هەواڵی فەرمی (العراقیە)ی ڕایگەیاندووە، یەدەگی دراوی نەختینەیی عێراق گەیشتە زیاتر لە ٩٩ملیار دۆلار و بەم نزیكانە دەگاتە ١٠٠ملیار دۆلار.
وتیشی، “زیادبوونی یەدەگی دراو ئاماژەیەكی دڵخۆشكەرە بۆ بانكی ناوەندیی تایبەت بۆ جێگیربوونی بەهای دۆلار و دینار”.
ڕاشیگەیاندووە، كە زیادبوونی یەدەگی دراوی نەختینەیی دەگەڕێتەوە بۆ بەرزبوونەوەی نرخی نەوت، بۆیە یەكەمجارە لە مێژووی دەوڵەتی عێراقدا یەدەگی دراوی نەختینەیی دەگاتە ئەو بڕە پارەیەی، كە ئێستا بانكی ناوەندیی ڕایگەیاندووە.
