پۆلیسی هەولێر رایگەیاند، لە ئۆپەراسیۆنێكدا دەستیان بەسەر چەندین پارچە چەك و تەقەمەنیدا گرت و 12 تۆمەتباریشیان دەستگیركرد كە بە شێوەیەكی نایاسایی مامەڵەیان بە كڕین و فرۆشتنی چەكەوە دەكرد.
بەڕێوەبەرایەتی پۆلیسی پارێزگای هەولێر لە راگەیەندراوێكدا بڵاویكردووەتەوە و دەڵێت:”دوای ئەوەی لەلایەن هاووڵاتیانەوە ئاگاداركراینەوە كە لە شوێنێكی شاری هەولێر بە شێوەیەكی نایاسایی مامەڵە بە كڕین و فرۆشتنی چەكەوە دەكرێت، دەستبەجێ تیمەكانمان لە بەڕێوەبەرایەتی پۆلیسی پارێزگای هەولێر دەستیان بە لێكۆڵینەوە كرد و پاش لێكۆڵینەوەیەكی ورد و كۆكردنەوەی زانیاری لەسەر ئەو شوێنە، دوای وەرگرتنی بڕیاری دادوەری لێكۆڵینەوە، ئۆپەراسیۆنێكمان بۆ سەر ئەو شوێنە ئەنجامدا و توانیمان دەستبەسەر چەندین جۆر پارچە چەكدا بگرین”.
پۆلیسی هەولێر دەشڵێت ئەو چەکانەی دەستیان بەسەردا گیراوە بریتین لە: یەك قەناس، 18 دەمانچە، 9 كلاشینكۆف، 174 مەخزەنی چەك، زیاتر لە شەش هەزار فیشەكی جۆراوجۆر و چەندین كەلوپەلی سەربازیی تر و ژمارەیەك ئۆتۆمبێل.
دەشڵێت:” لە ئۆپەراسیۆنەكەدا 12 تۆمەتباریان دەستگیركرد، كە مامەڵەیان بە چەكی نایاساییەوە دەكرد، سەرجەم تۆمەتبارەكانیش بەپێی ماددەی 15ی چەك، دراونەتە دادگا و پەڕاوی لێكۆڵینەوەیان بۆ كراوەتەوە”
