ئەمڕۆ پێنجشەممە، وەزارەتی داد ئەو بەڵگەنامانەی ڕەتکردەوە کە لەلایەن هەندێک لە دەزگاکانی ڕاگەیاندن و ماڵپەرەکانی سۆشیال میدیا سەبارەت بە جێبەجێکردنی سزای لەسێدارەدان بەسەر سزادراواندا بڵاوکرابونەوە.
وەزارەتەکە لە بەیاننامەیەکدا ئاماژە بەوەدەکات، “بە لەبەرچاوگرتنی بڵاوبوونەوەی هەواڵ لە بەشێک لە دەزگاکانی ڕاگەیاندن و ماڵپەڕە ساختەکان سەبارەت بە جێبەجێکردنی سزای لەسێدارەدان دژی سزادراوان و بڵاوکردنەوەی ناوی گریمانەیی، دەمانەوێت ڕوونی بکەینەوە، کە هیچ ڕاستییەک لەم هەواڵەدا نییە”،
هاوکات جەختیش لەوە کراوەتەوە، “ئەم زانیاریانە “چەواشەکارانە و نادروستن، و ئامانجیان ئاژاوەگێڕییە و سەرلێشێواندنی بیروڕای گشتییە”.
وەزارەت دووپاتی کردەوە، مافی تەواوی خۆیەتی سکاڵا لەسەر هەموو ئەو ماڵپەڕانە تۆمار بکات، کە هەواڵی ناڕاست و چەواشەکارانە بڵاودەکەنەوە، ئەم هەنگاوەش لە چوارچێوەی پەرۆشی وەزارەتدا دێت بۆ پاراستنی کۆمەڵگە لە دەنگۆ و هەواڵی ساختە کە کاریگەری لەسەر ئاسایش و سەقامگیرییەکەی هەیە.
دووپاتیشیکردەوە، عێراق پابەندبوونی تەواوی خۆی بە جێبەجێکردنی ستانداردە نێودەوڵەتییەکانی مافەکانی مرۆڤ و جێبەجێکردنی بەرنامەی چاکسازییەکەی دووپاتدەکاتەوە و داواش لە هاووڵاتیان و میدیاکان دەکات کە “دڵنیابن لە ڕاستی هەواڵەکان لە سەرچاوە فەرمی و باوەڕپێکراوەکانەوە و هەواڵی بێ بنەما بڵاونەکەنەوە.
شایەنی باسە لە هەندێک میدیا و ماڵپەڕە عێراقییەکان چەند ناوێک بڵاوکرانەوە، کە وانیشاندرا لە چوارەم ڕۆژی جەژنی قوربان لە گرتووخانەی حوت لە شاری ناسڕیەی ناوەندی پارێزگای زیقار لەسێدارەدراون.
