بەڕێوەبەرایەتی پۆلیسی گەرمیان ئاشكرای دەكات، ئێوارەی ئەمڕۆ منداڵێكی تەمەن دوو ساڵ كەوتۆتە ناو پڕۆژەیەكی ئاوەوە لە گوندی شێخ لەنگەر و گیانی لەدەستداوە.
عەقیدی مافپەروەر عەلی جەمال قدووری، وتەبێژی پۆلیسی گەرمیان ڕایگەیاند، ئێوارەی ئەمڕۆ شەممە لەگوندی شێخ لەنگەر سەر بەناحییەی کوڵەجۆ تەرمی منداڵێکی دوو ساڵان بەناوی ( محمد دڵشاد باقی) هێنرایە پزیشکی دادوەری قەزای کەلار، کەبەهۆی خنکان بەئاو گیانی لەدەستدابوو.
ڕاشیگەیاند، بەوتەی کەسوکاری، کەدانیشتووی قەزای کفرین و بەسەردان هاتبوونە گوندی ناوبراو منداڵەکەیان لەماڵ دەرچووە و کەوتۆتە پڕۆژەیەكی ئاوەوە، کەنزیکی ماڵەکەیان بووە و لەئەنجامدا گیانی لەدەستداوە.
جەختیشی كردۆتەوە، لەئێستادا پەڕاوی لێکۆڵینەوەی بۆ کراوەتەوە و پۆلیس دەستی بەلێکۆڵینەوە کردووە.
