خەڵات و گوڵ و دیارییان پێشکەش مەکەن بە کرداری خزمەتیان بکەن
کۆچەر عەزیز- ڕۆژنامەنووس
لە هەموو یاد و بۆنەکانی تایبەت بە کچان و ژنان دوو ڕۆژ پێش وادەی یادەکە و ئەو ڕۆژەی یادەکەش هەندێک جار، هەفتەیەک پێش ڕووداوەکانیش بابەتە ڕۆتین دووبارەکان وەک خەڵات و دیاری و دروشمی باق و بریق سۆشیاڵ میدیا و تۆڕەکۆمەڵایەتییەکان دەتەنێت، دەڵێی ئەم ژینگەیەی تێیدا دەژین هەر ئەو ڕووداوە و هەر ئەو یادەی تێدایە، بەڵام ئەمانە هەمووی ڕووکەشن و بۆ دەرخستنن.
یان دێن کۆنفرانس و کۆنگرە دەبەستن و ڕۆڵی ژنان و کچان دەبەنە لوتکە و دەڵێن دنیایەک شت دەکەین، بەڵام بەداخەوە کە دێتە سەر جێبەجێکردن حکومەت و لایەنە پەیوەندیدارەکانیش تەنها قسە و بەڵێنەکانیان لەو ڕۆژەدایە و بۆ ڕۆژی دواتر بڕناکات.
نموونەیەکی بچوک دەهێنمەوە تا بزانن دۆخەکە چۆنە…
تاکە سەنتەرێکی دەستنیشانکردنی شێرپەنجە هەیە لە سلێمانی کە ژنان و کچان لە هەموو شارەکانی هەرێمی کوردستان و تەنانەت ناوەڕاست و باشووری عێراقیشەوە ڕووی تێدەکەن بۆ دەستنیشانکردنی شێرپەنجە و پشکنینی پێشوەختەی نەخۆشییەکانی مەمک، نزیکەی دوو مانگە دوو ئامێری مامۆگرافی هەیە شکاون، حکومەت و وەزارەتی تەندروستیشی لێ ئاگادارکراوەتەوە.
دەبێت ئەوە بڵێم رەنگە چاککردنەوەی ئامێرەکان نزیکەی ١٠ هەزار دۆلاری بوێت کە ڕۆژانە دەتوانرێت بەهۆیەوە ٢٠بۆ ٢٥ ژن و کچ پشکنینیان بۆ بکرێت و لە ڕێگەیەوە بە کرداری خزمەتی ژنان و کچان بکرێت کە ڕەنگە دە ئەوەندەی دیارییەک کە گوڵێکە بە نرخ بێت بۆیان، بەڵام هەر دەستی دەستی پێدەکرێت و ئەم نووسراو بە ئەو دەسپێرێت و لەکۆڵ خۆیانی دەکەنەوە…
ئەمە نموونەیەکی بچووکە کە دەکرێت لە ڕێگەیەوە بە کرداری خزمەت بە ژنان و کچان بکرێت، دڵنیام ئێستاش چەندەها کێشە و گرفتی دیکەی ژنان و کچان هەیە ئەگەر رۆژانی دیکەش نەکرێت لە بۆنەکانی تایبەت بە ژنان و کچاندا دەتوانرێت ساڵانە گەر جارێکیش بێت پەی ببرێت و چارەسەر بکرێت.
بۆیە دەبێت لە کاتی یادەکاندا بەرپرسان لایەنە و پەیوەندیدارەکان دەست بخەنە سەر برینەکان و چارەسەریان بۆ بدۆزنەوە تا لە ڕێگەیەوە بە کرداری خزمەت بەهەموو ژنان و کچانی کۆمەڵگە بکەن بێ جیاوازی، نەک لە نووسینگەکانیانەوە بەپەیامێکی نووسراو پیرۆزباییان بۆ بنێرن.
