پەرلەمانتارێكی یەكێتی پێی وایە، وەزارەتی دارایی عێراق له “بیانو” ده‌گه‌ڕێت و ده‌یه‌وێت ڕه‌وانه‌كردنی پاره‌ی مووچه‌ی فه‌رمانبه‌ران دوابخات و جێگری پێشووی سەرۆكی پەرلەمانی عێراقیش دەڵێت: ” دوورنییە ئەم مانگەش ناردنی 618 ملیار دینارەکە دوابکەوێت”.
بەشیر حەداد، جێگری پێشووی سەرۆكی پەرلەمانی عێراق ڕایگەیاندووە، بودجە بۆتە کارتێکی سیاسی بەدەست بەغداوە و دوورنییە ئەم مانگەش ناردنی 618 ملیار دینارەکە دوابکەوێت.
لای خۆشیەوە، غەریب ئەحمەد، ئەندامی پەرلەمانی عیراق لە فراكسیۆنی یەکێتی وتی، “بەغدا داوایەکی نوێی ئاراستەی هەرێم كردووە بۆ ناردنی مووچە و وەزارەتی دارایی عیراق داوای وردەکاریی لیستی میلاکات و مووچەی هەرێمی کوردستانی كردووە و ئەوەش یەكەمجارە ئەو داوایە بكات”.
وتیشی، “تاوەكو هەمواری یاسای بودجە دەچێتە بواری جێبەجێكردنەوە لە بەغداوە بە میزاجی شەخسی مانگانە داواكارییەك لە هەرێم دەكرێت، كە زیاتر بیانووە و ناچنە چوارچێوەیەکی یاساییەوە”.
ئاشكراشی كردووە، حكومه‌تی عێراق له “بیانو” ده‌گه‌ڕێت و ده‌یه‌وێت ره‌وانه‌كردنی پاره‌ی مووچه‌ی فه‌رمانبه‌ران دوابخات، چونكە به‌غدا پێیوایه ژماره‌ی مووچه‌خۆران له 700 هه‌زار مووچه‌خۆر تێناپه‌ڕێت، به‌ڵام هه‌رێم لیستێكی مووچه‌ی داوه به به‌غدا كه زیاتر له ملێۆنێك مووچەخۆرە.
جەختیشی كردۆتەوە، یەكێتی هەوڵەكانی چڕكردووەتەوە لە ئەنجوومەنی وەزیران و پەرلەمان و خودی سەرۆكی یەكێتیش لەگەڵ لایەنە سیاسییەكان لەسەر هێڵە، كە هەموارەكە لەپەرلەمانەوە كێشەی بۆ دروست نەكرێت و زوو بچێتە بواری جێبەجێكردنەوە، تاوەكو مانگانە لەكاتی خۆیدا پشكی هەرێم ڕەوانە بكرێت.
