شارەزایەكی كەشناسی هەرێم ئاشكرای دەكات، بەپێی پێوانە فەلەكییەكان سبەینێ پێنج شەممە یەكەم ڕۆژی وەرزی زستانە. بەمەش ئەمشەو دەبێتە درێژترین شەوی ساڵ لە نیوەگۆی باكووری زەوی “شەوی یەڵدا” و سبەینێ دەبێتە كورتترین ڕۆژی ساڵ.
بە پێی پێوانە فەلەكییەكان، ڕۆژی پێنج شەممە بەرواری 21- 12- 2023 تیشكی خۆر بە شێوەیەكی ستوونی دەبێت لەسەر (خولگەی گیسك) لە نیوەگۆی باشووری زەویدا و ماوەی ڕۆژ دەگاتە درێژترین ڕۆژی ساڵ و ئەمشەوی دەبێتە كورتترین شەو، بەڵام لە نیوەگۆی باكووردا ماوەی ڕۆژ دەگاتە كورتترین ئاستی خۆی و ئەمشەویش دەبێتە درێژترین شەوی ساڵ، كە بە “شەوی یەڵدا” ماسراوە و بە پێچەوانەوە لە وڵاتانی نیوەگۆی باشوور دەبێتە درێژترین ماوەی ڕۆژ.
سەبارەت بە نیوەگۆی باكوور، ئەو دیاردەیە ناسراوە بە (وەرگەڕانی زستانە) و خۆر دەگاتە نزمترین ئاستی خۆی لە ئاسمانی نیوەگۆی باكووردا، بە پێچەوانەی نیوەگۆی باشوور، كە دیاردەكە ناسراوە بە (وەرگەڕانی هاوینە) و خۆر تیایدا دەگاتە بەرزترین ئاست لە ئاسمان و لە كاتی نیوەڕۆدا.
محەمەد كەمال، شارەزای كەشناسی بۆ (خەڵك) ڕایگەیاند، سبەینێ یەكەم ڕۆژی وەرزی زستانی ئەمساڵ دەستپێدەكات و ماوەی نێوان زەوی و خۆر دەگاتە نزیكترین خاڵ.
ئەو گۆڕانكارییەی ڕوودەدات لە پلەكانی گەرما و وەرگەڕانی (زستان و هاوینە) دەگەڕێتەوە بۆ لاریی تیشكی خۆر لەسەر ڕووی زەوی نەوەك دووری یان نزیكی لە خۆرەوە.
