بڕیارە هێڵی شەمەندەفەری سنە تا دەروازەی باشماخ لە مەریوانی ڕۆژهەڵاتی کوردستان درێژ بکرێتەوە و پارێزگاری سلێمانیش داوای کردنەوەی دەروازەی سازانی گەیاندە سەرۆك کۆماری ئێران.
ئەمڕۆ پێنجشەممە، ئیبراهیم ڕەئیسی، سەرۆك کۆماری ئێران وێستگە و هێڵێ شەمەندەفەری سنە بۆ هەمەدانی ڕۆژهەڵاتی کوردستانی کردەوە.
لە ڕێوڕەسمەکەدا ڕەئیسی وتی: “دەبێت داخوازییەکانی خەڵک جێبەجێ بکرێن و هێڵی سنە بۆ باشماخ دابڕێژرێت و ئەو هێڵە نێودەوڵەتی و ترانزیتییە بکرێتەوە”.
وتیشی: “کوردستان گەییشتووەتە قۆناغێک کە تا چەند مانگی داهاتوو دەتوانێت بچێتە ڕیزی پارێزگا سەوزەکانەوە لە بواری گەیاندنی گازدا”.
هەر لەو ڕێوڕەسمەدا کە هەڤاڵ ئەبوبەکر پارێزگاری سلێمانی ئامادەبوو و دیدارێکی کورتیشی لەگەڵ ئیبراهیم ڕەئسی ئەنجام دا.
پارێزگاری سلێمانی ڕایگەیاند، سەرۆک کۆماری ئێران بڕیاریدا هێڵی شەمەندەفەری کوردستان تا دەروازەی نێودەوڵەتی باشماخ درێژبکرێتەوە و ئەم هێڵە بە هێڵی ناوخۆیی و نێودەوڵەتیی ئێرانەوە ببەسترێتەوە، هەروەها پەیوەندیی و ئاڵوگۆڕە بازرگانیی و ترانزێتییەکان لەگەڵ هەردوو دەروازەی نێودەوڵەتیی باشماخ و پەروێزخان بەهێزتربکرێت.
پارێزگاری سلێمانی وتیشی: “داوای کردنەوەی مەرزی سازان لە پارێزگای هەڵەبجەشمان گەیاندە بەڕێز سەرۆک کۆماری ئیسلامیی ئێران، بە ئومێدی ئەوەی لە ئایندەدا ئەم مەرزەش بە فەرمیی بکرێتەوە”.
وەزیری ڕێگاوبان و شارسازیی ئێران پارێزگاری سلێمانی بانگهێشت کرد بۆ تاران، بەمەبەستی گفتوگۆی زیاتر لەسەر هێڵی شەمەندەفەری کوردستان.
