ناوی ئیسرائیل لەسەر نەخشە سڕایەوە

ناوی دەوڵەتی ئیسرائیل لەسەر زۆرینەی ئەو نەخشە ئۆنلاینانە سڕدراونەتەوە کە لەلایەن کۆمپانیا چینییەکانەوە خاوەندارێتییان دەکرێت.

ڕۆژنامەی وۆڵ ستریت جۆرناڵی ئەمریکی بڵاویکردەوە، لەگەڵ پەرەسەندن و تەشەنە کردنی زیاتری ململانێ و شەڕی نێوان ئیسرائیل و فەلەستین چەند کۆمپانیایەکی دیجیتاڵی چینی کە بەشێوازی ئۆنلاین کار دەکەن وەک کۆمپانیاکانی بایدۆ و عەلی بابا ناوی ئیسرائیلیان لەناو سیستمەکانیاندا لابردووە.

ڕۆژنامەکە ئاماژەی بەوەکردووە، لەنەخشە ئۆنلاینەکانی چیندا ناوی هەریەکە لە ئوردن و میسر و سەرجەم وڵاتانی دیکەی دراوسێی ئیسرائیل دەردەکەوێت، بەڵام ناوی ئیسرائیل سڕاوەتەوە.

نیکەی چوار هەفتەیە شەڕی نێوان ئیسرائیل و بزوتنەوەی حەماسی فەلەستینی لە کەرتی غەززە دەستی پێ کردووە و لەیەکەم ڕۆژی جەنگەکەوە سوپای ئیسرائیل بەشێوەیەکی هەڕەمەکی بۆردوومانی بۆسەر کەرتی غەززە دەست پێ کردووە و دەیان هەزار بینا ڕووخاوە هەزارن کەسی مەدەنی کە زۆرینەیان ژن و منداڵن لە بۆردومانەکاندا گیانیان لەدەستداوە.

هەندێک لە وڵاتان و بەتایبەتی وڵاتانی ڕۆژئاوا بەشێوەیەکی ڕوون بشتگیری خۆیان بۆ ئیسرائیل دەربڕیووە، لەبەرامبەردا چەندین وڵاتی دیکە داوای ڕاگەیاندنی ئاگربەست و کۆتایی هێنان بە بۆردومانەکانیان کردووە کە دیارترینیان ڕوسیایە و سەرۆکی ئەو وڵاتە دەڵێت، “پێویستە دەوڵەتی سەربەخۆی فەلەستین ڕابگەیەنرێت.”