ئەمڕۆ پێنجشەممە، محەمەد شیاع سودانی سەرۆکوەزیرانی عێراق بۆ لە نزیکەوە ئاگاداربوون لە هۆکار و چۆنێتی کەتنەوەی ئاگرەکەی قەزای حەمدانییە گەیشتە موسڵ.
نوسینگەی ڕاگەیاندنی سەرۆکوەزیرانی عێراق بڵاوی کردووەتەوە سوودانی بەمەبەستی لە نزیکەوە ئاگاداربوون و بۆ بەشداری و هاوخەمی کارەساتە دڵتەزێنەکە سەردانی موسڵی کردووە.
ئاماژەی بەوەشکردووە، سەرۆکوەزیران سەردانی بریندارەکان دەکات و خانەوادەی قوربانیانیش بەسەر دەکاتەوە.
شەوی سێشەممەی ڕابردوو لەکاتی ئاهەنگێکی هاوسەرگیری لەو هۆڵەی ئاهەنگەکەی تێدا بەڕیوەدەچوو لە قەزای حەمدانییەی سەر بەپارێزگای موسڵ ئاگر کەوتەوە و بەهۆیەوە سەدان کەس گیانیان لەدەستدا و سەدان کەسی دیکەش برینداربوون.
سەرۆکوەزیرانی عێراق وەزیری ناوخۆی ڕاسپارد هەموو هەوڵێکی خۆی لەپێناو هاوکاریکردن و ڕزگارکردنی ژیانی ئەوانەدا بخاتەگەڕ کە لەڕووداوەکەدا زیانمەند بوون و حکومەتی عێراقیش بەوهۆیەوە سێ ڕۆژ ماتەمینی لەسەرتاسەری وڵاتدا ڕاگەیاند.
