نەبوونی مووچە و پلەبەرزكردنەوە، نوێنەرانی مامۆستایان و فەرمانبەرانی ناڕازی گەیاندە بەغدا و بڕیاریشە هەفتەی داهاتوو خۆپیشاندان دەستپێبكاتەوە.
عادل حەسەن، ئەندامی مامۆستایانی ناڕازی بڵاویكردەوە، نوێنەرانی مامۆستایانی و فەرمانبەرانی ناڕازی گەیشتنە بەغدا بۆ كۆبوونەوە لەگەڵ لیژنەی دارایی پەرلەمانی عێراق.
بڕیارە نوێنەرانی مامۆستایان و فەرمانبەران لەگەڵ لیژنەی دارایی پەرلەمانی عێراق گفتوگۆ بكەن لەسەر پرسی ناردنی مووچەی مامۆستایان و فەرمانبەران ڕاستەوخۆ لە بەغداوە یان جیاكردنەوەی پشكی مووچە لەناو یاسای بودجە.
بەپێی زانیارییەكانی (خەڵك) مامۆستایان و فەرمانبەرانی ناڕازی هەوڵ دەدەن بۆ دەستپێكردنەوەی پلەبەرزكردنەوە، كە ماوەی 8 ساڵە ڕاگیراوە.
بەپێیی بەیاننامەیەكی پێشتری مامۆستایان و فەرمانبەرانی ناڕازی، ڕۆژی یەك شەممە لەگەڵ دابەشكردنی مووچەی مامۆستایان دەست بە خۆپیشاندان بكەنەوە بۆ پێدانی مووچەی مانگی 8 و دەستپێكردنەوەی پلەبەرزكردنەوە.
