جەزا محەمەد عەلی جێگری سەرۆکی یەکێتی فەرمانبەرانی کوردستان لقی سلیمانی،لە کۆنفرانسێکی ڕۆژنامەنووسیداڕایگەیاند، بایکۆتی دەوام دەکەن و دەنگی خۆیان دەخەنە پاڵ مامۆستایان و فەرمانبەران کە بایکۆتیان کردووە و تا مووچەکانی سێ مانگیان پی نەدرێت ناچنەوە دەوام.
لەبەیاننامەکەی یەکێتییەکە ئەوەش ڕاگەیەندرا، لە ساڵانی پێشوودا فەرمانبەران و مامۆستایان دروشمێکمان هەبوو کە دەمان وت” سەری بەرز نەوی ناکەین بۆ مووچە”، بەڵام ئێستە پارە هەیە و ئەم دروشمە بۆ ئەم سەردەمە نابێت.
یەکێتی فەرمانبەران ڕاشیگەیاند، هیچ کەسێک ناتوانێت بە یاسایی سزای هیچ فەرمانبەرێک بدات لەوەی بایکۆتی کردووە، چونکە فەرمانبەران زۆرینەیان کرێچین و ناتوانن بژێوی دابین بکەن، هەروەها ئەرکی حکومەتە مووچە بۆ سەرجەم فەرمانبەران و مامۆستایان دابین بکات.
لەبەیاننامەکەدا ئەوەش خراوەتەروو،ئێمە وەک تۆپێکمان لێهاتووە بەدەست حکومەتی عێراق و هەرێمیشەوە ڕۆژانە یاری بە هەست و بژێویمان دەکەن،
هەروەها داواشییان کرد لەئەگەری دابینکنەکردنی مافەکانمان پەنا دەبەینە بەر نەتەوەیەکگرتووەکان و لایەنە جیهانییەکان،
هەروەها ڕایانگەیاند ماوەی 10 ساڵە پلەی فەرمانبەرانی ڕاگەیاندووە و لەدوای شەڕی داعشەوە ئەم مافەمان زەوت کراوە، حکومەتی هەرێم مانگانە پارەی زۆری بۆ دێتەوە و ناتوانێ مووچە دابین بکات،
پێویستە مووچە پاشەکەوتەکان و ئەوانەی نەدراون بۆمان بگەڕیننەوە، هەروەها پلەبەرزکردنەوە و مامۆستایان و فەرمانبەرانی گرێبەست بکرێنە هەمیشەیی،
ڕۆژی 13/9 یەکەم ڕۆژی دەستپیکی دەوامی فەرمی ناوەندەکانی خوێندن بوو، بەڵام مامۆستایان بەهۆی وەرنەگرتنی مووچەی مانگەکانی ٧ و ٨ ەوە بایکۆتیان راگەیاند و دوابەدوای ئەوانیش تەندروستی بایکۆتی ڕاگەیاند و لە ئێستاسدا زۆرێک لە فەرمانگە و سێکتەرەکانی حکومەت بایکۆتی دەوامیان کردووە، و مەرجی شکاندنی بایکۆتیس پیدانی لایەنی کەم دوو مووچەیە.
