![](https://xelk.org/wp-content/uploads/2024/03/awincity2.png)
تەندروستی سلێمانی وردەكاری ڕووداوەكەی ئەمڕۆی شارەزوور ئاشكرادەكات و ڕایدەگەیەنێت، لە ئەنجامی ڕووداوەكەی ئەمڕۆدا لە شارەزوور 9 كەس بوونە قوربانی، كە دووانیان گیانیان لەدەستداوە و بە ڕەگەز عەرەبن.
سامان شێخ لەتیف، وتەبێژی تەندروستی سلێمانی بۆ (خەڵك) ڕایگەیاند، بەداخەوە لە ڕووداوی هاتووچۆی ئەمڕۆ لە سەر ڕێگەی شارەزوور – سەیدسادق ، کە بەهۆیەوە ( ۲ ) هاووڵاتی گیانیان لەدەستداوە لەئیستادا لەپەیمانگای پزیشکی دادیین لەسلێمانی.
ڕاشیگەیاند، بەهۆی ڕووداوەكەوە (۷) هاووڵاتی تر برینداربوون لەڕێگەی تیمەکانی فریاکەوتنی تەندروستی ڕەوانەی فریاکەوتنی نەخۆشخانەی شار کراون و (۳) لەو هاووڵاتیانە باری تەندروستیان جێگیر نیە و لەژێر چاودێری چڕدان و (٤) هاوڵاتیەکەی تر تەندروستیان جێگیرە.
نەخۆشخانەی گشتی شەهید ڕٶوف بەگ لە ڕاگەیەنراوێكدا ئاماژەی بەوەكردووە، کاتژمێر ۱۰ ی پێش نیوەڕۆی ئەمڕۆ بەهۆی ڕووداوێکی هاتوچۆوە ۹ هاووڵاتی تر بەسەختی برینداربوون، پاش گەیاندنیان بە هۆبەی فریاکەوتی نەخۆشخانەی گشتی شەهید ڕٶوف بەگ و فریاگوزاری سەرەتایی بۆ بریندارەکان دواتر بە چوار ئۆتۆمبێلی فریاکەوتن بریندارەکان ڕەوانەی فریاکەوتنی سلێمانی کران .
ڕاشیگەیاندووە، ڕووداوەکە لەنێوان دوو ئۆتۆمبێلی تایبەت لەسەر ڕێگای نێوان شارەزوور – سەیدسادق نزیک گوندی مەحمودخانی ڕوویداوە و دەستبەجێ دوو کەسیان گیانیان لەدەستداوە.
ڕوونیشی كردۆتەوە، ئەو دوو كەسەی گیانیان لەدەستداوە باوکێکی تەمەن سەروو 50 ساڵێک و منداڵێکی ساوای تەمەن سەروو چوار مانگ بووە، کە بەڕەگەز عەرەب بوون و پاش گەیاندنی بە فریاکەوتنی سلێمانی بەهۆی سەختی برینەکەیانەوە گیانیان لەدەستداوە .