ئەمڕۆ شەممه ، هێزەکانی پاسەوانی سنووری ئێران له پارێزگای سنووریی سیستان و به لوچستان ڕوودانی تێکهەڵچوونیان لەگەڵ هێزەکانی تاڵیبان ڕاگەیاند، که له ئەنجامدا ژمارەیەک چەکدار كوژران و وەك ئێران دەڵێت: “ئەو چەكدارانە ویستویانە هێرش بكەنە سەر خاكی ئێران”.
ئاژانسی هەواڵی (تەسنیم) لە زاری پاسەوانانی سنووری ئێرانەوە بڵاویکردەوە، شەڕ و پێکدادانەکانی نێوان هێزەکانی تاڵیبان و پاسەوانانی سنووری ئێران لەسەر سنوورەکانی پارێزگای سیستان و بەلوچستانی ئێران و پارێزگای نەمرۆزی ئەفغانستان ڕوویداوە.
پاسەوانانی سنووری ئێران ڕاشیگەیاندووە، “ئەو تێکهەڵچوونە بەهۆی هەوڵی چەکدارانی نەناسراو بۆ چوونە ناو خاکی ئێران ڕوویداوە و ئاڵوگۆڕی تەقەی نێوان هەردوو لایەن بۆتە هۆی زیانێکی زۆر لەنێو چەکدارەکاندا”.
ئاماژەی بەوەشكردووە، “پێکهەڵچوونەکان كۆتایی هاتووە” دوای ئەوەی باڵیۆزخانەی ئێران لە کابوڵ پەیوەندی لەگەڵ بەرپرسە پەیوەندیدارەکانی تاڵیبان كردووە.
