بڕیارە لەم هەفتەیەدا شایستەی دارایی مامۆستایانی وانەبێژ بۆ مانگی 10 دابەشبكرێت.
مامۆستایانی وانەبێژ لە سنووری سلێمانی و هەولێر شایستە داراییەكانیان وەردەگرن.
محەمەد كەمال، مامۆستای وانەبێژ، بە (خەڵك)ی ڕاگەیاند، بڕیاردراوە لەم هەفتەیەدا شایستەی دارایی مامۆستایانی وانەبێژ لە سنووری سلێمانی و هەولێر دابەشبكرێت.
وتیشی،” ئەو پارەیەی دەدرێت بە مامۆستایانی وانەبێژ لە داهاتی ناوخۆ دەدرێت واتە لە پارەی گومرگ و باج و ئەو داهاتانە دەدرێت كە لە ناوخۆ كۆدەكرێنەوە، لە بودجەی گشتیدا نییە”.
ئەوە لەكاتێكدایە مامۆستایانی وانەبێژ لە زۆرێك لە شار و شارۆچكەكانی هەرێمی كوردستان بایكۆتی هۆڵەكانی خوێندنیان كردووە و داوای بە هەمیشەیی بوون دەكەن، و ناو بەناو خۆپیشاندان ئەنجام دەدەن.
محەمەد كەمال، مامۆستای وانەبێژ دەڵێت،” ئێمە بۆ پارە نەهاتوینەتە سەر شەقام و لە داواكردنی مافەكانمان و بایكۆتكردنی خوێندن بەردەوام دەبین”.
زیاتر لە 30 هەزار مامۆستای وانەبێژ لە هەرێمی كوردستاندا هەن، ئەو مامۆستایانە بە گرێبەست وانە دەڵێنەوە و بە پێی ژمارەی وانەكان شایستەی داراییان پێدەدرێت.
