لە ئەگەری بەردانەوەی ئاوی بەنداوی دەربەندیخان بەڕێوەبەری بەنداوەكە هۆشداری دەدات و داوا دەكات كە خاوەن كەپرە گەشتیارییەكان و ئەوكەسانەی لە كەناری ڕووبارەكەن بۆ ماوەی ئەم دووڕۆژە لەو ناوچانە دوور بكەونەوە.
سامان ئیسماعیل، بەڕێوەبەری بەنداوی دەربەندیخان بڵاویكردووەتەوە،” لەماوەی ئەم دوو ڕۆژەدا بە پێی وتەی كەشناسی و شارەزایان ڕێژەی دابارین زیاد دەكات و زانیارییان نییە لەبارەی بەنداو و داتاكانی كۆماری ئیسلامی ئێران لە ئەگەری بەردانەوەی ئاوی زیاتر، كە بەنداوی دەربەندیخان توانای گلدانەوەی نزیكەی ملیارێك و 400 ملیۆن مەتر ئاوی هەیە، ماوەی دوو ڕۆژە ئێران ئاوی زیاتر بەردەداتەوە”.
ئاماژە بە ئەوەش دەكات،” بۆ ئەوەی هیچ ڕووداوێكی نەخوازراو لەئەگەری ناچاربوون بە بەردانەوەی ئاو لەبەنداوەكە ڕوونەدات، خاوەن كەپرەگەشتیاریەكان و ئەو كەسانەی لەكەناری ڕووبارەكەن بۆ ماوەی ئەم دوو ڕۆژە لەو ناوچانە دوور بكەونەوە.”
لە شەوی ڕابردووەوە، شەپۆلێكی بەهێزی باران بارین ڕووی لە هەرێمی كوردستان كردووە و لە بەشێكی زۆری ناوچەكانیش هۆشداری لە دروستبوونی لافاو دراوە.
