سەیفوڵڵا حوسێنی، مامۆستای ئایینیی خەڵكی جوانڕۆ لەلایەن دادگای تایبەت بە مامۆستایانی ئایینی لە هەمەدان، سزای ١٧ ساڵ بەندكردن، ٧٤ زەر بە قامچی، ٢ ساڵ دوورخستنەوەی بۆ ئەردەبیل و داماڵینی بەرگی مامۆستایەتی بەسەردا سەپێندرا.
بەپێی ڕاپۆرتی گەیشتوو بە ڕێكخراوی مافی مرۆڤی هەنگاو، ئەو هاووڵاتییە بە تۆمەتی “ئەندامبوون لە مەكتەب قورئانی كوردستان” سزای ٦ ساڵ بەندكران، بە تۆمەتی “چالاكی بڵاوكردنەوە دژی دەوڵەت” سزای ١٥ مانگ بەندكران، بە تۆمەتی “هاندانی خەڵك بۆ تێكدانی ئاسایشی وڵات” سزای ٦ ساڵ بەندكران، “بێ ڕێزیكردن بە دامەزرێنەری كۆماری ئیسلامی ئێران و ڕێبەری كۆماری ئیسلامی ئێران” سزای ٢ ساڵ و شەش مانگ بەندكران، “تێكدانی ڕەوشی گشتی” سزای ١٥ مانگ بەندكردن و ٧٤ زەربە قامچی، داماڵینی بەرگی مامۆستایی و ٢ ساڵ دوورخرانەوەی بۆ ئەردەبیل بەسەردا سەپێندرا.
بڕیاری دادگا و سزا سەپێندراوەكان بەسەر سەیفوڵڵا حوسێنی، پێش نوێژی مزگەوتی خاتەمولئەنبیا لە جوانڕۆ ڕۆژی چوار شەممە بە بنەماڵەكەی ڕاگەیەندراوە.
رۆژی سێشەممە ئەو مامۆستا ئاینییە لەلایەن هێزە ئەمنییەكانەوە لە نێو ماڵەكەی خۆیدا دەستگیركراوە.
