بافڵ تاڵەبانی، سەرۆکی یەکێتیی لە بارەگای مەکتەبی سیاسی لە هەولێر پێشوازی لە ئەلینا ڕۆمانۆسکی، باڵیۆزی ئەمریکا لە عیراق کرد.
بەپێی ڕاگەیەنراوێكی نووسینگەی سەرۆكی یەكێتی، لە كۆبوونەوەكەدا دۆخی سیاسیی هەرێم، عیراق و ڕۆژهەڵاتی ناوەڕاست گفتوگۆی لەبارەوەکرا و جەخت لە بەردەوامیی هەوڵە نیشتمانییەکانیان کرایەوە لەپێناو تێپەڕاندنی بەربەستەکان و زاڵبوون بەسەر ئاڵنگارییەکاندا.
بافڵ تاڵەبانی لەبارەی کۆی هاوکێشەکانەوە سیاسەت و ستراتیژی یەکێتیی خستەڕوو و ڕایگەیاند، پاراستنی سەقامگیریی وڵات و بونیادنانی داهاتوویەکی گەشتر پەیوەستە بە هاریکاری و هەماهەنگیی نێوان سەرجەم هێز و لایەنەسیاسییەکان و گفتوگۆی بونیادنەرانەوە.
ئاماژەی بەوەشکردووە، پێویستە هەمووان بەرپرسانە مامەڵە لەگەڵ دۆخەکە بکەن و بە ئامانجێکی هاوبەشەوە کار بۆ ئاوەدانیی و خۆشگوزەرانیی وڵات بکەن.
وتیشی، “بۆ بەدیهێنانی ئەم ئامانجە باڵایانەش پێویستە پارێزگاریی لە هاوبەشیی راستەقینە، تەبایی و پێکەوەژیان بکەین”.
