ماوەی سێ ڕۆژە دانیشتووانی گوندەکانی ناحیەی خەلەکانی سەر بە قەزای دوکان ناڕەزاییان دژی کەمی خزمەتگوزاریی دەستپێکردووە و تا ئێستا هیچ بەرپرسێك نەچووە بەدەنگیانەوە.
ئەمڕۆ پێنجشەممە، گردبوونەوە و ناڕەزایی دانیشتووانی گوندەکانی ناحیەی خەلەکان پێ دەنێتە ڕۆژی سێیەمییەوە کە دژی خراپیی ڕێگەوبان، کەمیی ئاو و کارەبا دەستیپێکردووە.
دانیشتووانی ئەو گوندانە، ڕێگەی نێوان دوکان و ڕانیەیان بە ڕووی ئۆتۆمبێلە بارهەڵگرەکان داخستووە کە بە هۆکاری تێکچوونی ڕێگەکەیان دەزانن و تەنها ڕێ بە هاتووچۆی ئۆتۆمبێلی بچووك دەدەن.
تا ئێستا هیچ بەرپرسێك نەچووە بەدەنگ ئەو هاووڵاتییانەوە و ئەوانیش دەڵێن هەتا بەڵێنی چارەسەرکردنی کێشەکانیان پێ نەدرێت، لە داخستنی ڕێگەکە بەردەوام دەبن.
