سەرۆکی ڕووسیا لە یەك ڕۆژدا سەردانی ئیمارات و سعوودیە دەکات و کەمکردنەوەی بەرهەمهێنانی نەوت و شەڕی نێوان ئیسرائیل و حەماس دیارترین تەوەری گفتوگۆکانی دەبن لەگەڵ بەرپرسانی هەردوو وڵاتدا.
بڕیارە ئەمڕۆ چوارشەممە، ڤلادیمێر پوتن سەرۆکی ڕووسیا سەردانی ئیمارات و سعودیە بکات پێش ئەوەی بگەڕێتەوە بۆ مۆسکۆ و پێشوازی لە سەرۆکی ئێران بکات.
کۆشکی کریملن بڵاویکردەوە، سەردانەکەی پوتن بۆ ئیمارات و سعوودیە یەك ڕۆژ دەخایەنێت و تێیدا پتەوکردنی پەیوەندییەکان و دۆسێ هەرێمییەکان، لە نێویشیاندا شەڕی ئیسرائیل و حەماس لەگەڵ بەرپرسانی باڵای هەردوو وڵات تاوتوێ دەکات.
کەمکردنەوەی ئاستی وەبەرهێنانی نەوتی وڵاتانی ئەندامی ئۆپیك پڵەس، تەوەرێکی دیکەی گفتوگۆکانی سەرۆكی ڕووسیا و بەرپرسانی دوو وڵاتە کاریگەرەکەی کەنداو دەبێت.
لە دوای ساڵی 2019ەوە ئەمە یەکەم جارە پوتن سەردانی کەنداو بکات.
بڕیارە دوای سەردانە یەك ڕۆژییەکەی بۆ کەنداو، سەرۆکی ڕووسیا بگەڕێتەوە بۆ مۆسکۆ و سبەینێش پێشوازی لە ئیبراهیم ڕەئیسی سەرۆكی ئێران بکات کە بە گرنگترین هاوپەیمانی ڕووسیا دادەنرێت لە ڕۆژهەڵاتی ناوەڕاستدا.
