بەپێی پێشبینییە كەشناسییەكان، سبەینێ باران بارین ناوچەكانی هەرێمی كوردستان دەگرێتەوە و پلەكانی گەرما نزیكەی 3 پلە ڕوو لە نزمبوونەوە دەكەن و بەهۆیەوە كەشێكی ساردی زستانە دەستپێدەكات.
ئاراس جەبار، شارەزای كەشناسی بۆ (خەڵك) ڕایگەیاند، لەئەنجامی بەردەوامی کاریگەری نزمە پاڵەپەستۆی دەریای ناوەڕاست سبەی دوو شەممە 27/11/2023 ئاسمانی ھەرێم بەدرێژایی کاتەکان ھەوری تەواو ئەبێت، لەگەڵ بارانی رێژە مامناوەند و پچڕ پچڕ لە سنوری ئیدارەی ڕاپەڕین و سەنتەری پارێزگای دھۆک و ھەولێر و سلێمانی و ھەڵەبجە.
ڕاشیگەیاند، لەناوچە شاخاوییەکاندا ڕێژەی دابارین زیاتر ئەبێت و بارانەکە بەشێوەی بەردەوام ئەبێت و ھەندێک کاتیش بارانەکە ئەوەستێت.
وتیشی، “لەناوچەکانی سنوری پارێزگای کەرکوک و سنوری ئیدارەی گەرمیان کاریگەری بارانەکە لاواز ئەبێت ھەندێک کات ئەگەری نمە بارانی پچڕ پچڕ و ھەندێ ناوچەش بارانی مامناوەندی ئەبێت”.
ئاماژەی بەوەشكرد، پلەکانی گەرما بەراورد بە ئەمڕۆ 2 تا 3 پلە نزمدەبنەوە و خێرایی با زۆربەی کاتەکان چالاک ئەبێت لەنێوان 15-30 کم لە کاتژمێرێکدا.
بەپێی پێشبینی ئەو شارەزایەی كەشناسی، “کاریگەری ئەم شەپۆلە لەناوچەکانی سنوری پارێزگای دھۆک و ھەولێر لە سبەی ئێوارەوە کۆتایی پێدێت و لەناوچەکانی سنوری پارێزگای ھەڵەبجە و سلێمانی و بەگشتی ناوچە شاخاوییەکانی ڕۆژھەڵاتی ھەرێم تا کاتەکانی شەو درێژەی ئەبێت”.
