کەشناسی هەرێمی کوردستان ڕایگەیاند، پێشبینى هاتنى کەشێکى ناسەقامگیر دەکرێت و چەند ڕۆژێکیش بەردەوام دەبێت.
ئەمڕۆ یەکشەممە، بەشی پێشبینی لە وەزارەتی گواستنەوە و گەیاندنی هەرێمی کوردستان ڕایگەیاند، نزمە پاڵەپەستۆی لاوازى تورکیا بۆ سەر هەرێمی کوردستان درێژدەبێتەوە و کاریگەرییەکەى لە درەنگانى شەوى سێشەممە دەست پێدەکات و لە ڕۆژى چوارشەممەدا کاریگەرىیەکە زیاد دەبێت.
ڕوونیشیکردەوە کە بەهۆی ئەو نزمەپاڵەپەستۆیەوە نمە باران و بارانى مامناوەند لە سەرجەمى ناوچەکەمان دەبارێت و هەورە تریشقەشی لەگەڵ دەبێت.
ئەوەشی خستەڕوو کە پێشبینی دەکرێت پلەکانى گەرما بە نزیکەى (4-6) پلەی سیلیزى نزم ببنەوە و لە ناوچە شاخاوییەکانیش زیاتر دادەبەزێت.
بەشی پێشبینی وەزارەتی گواستنەوە ڕاشیگەیاند، کاریگەرى ئەم شەپۆلە بە دووقۆناغ دەبێت، قۆناغى یەکەم تا ڕۆژى پێنجشەممە دەبێت و ڕۆژى هەینىش لە کاتى نەگۆڕانى کەشەکەدا قۆناغى دووەم دەست پێدەکات کە پێشبینى دابارین لەم قۆناغەیان زیاتر دەبێت.
